‘हेल्लो काँशिराम’बारे निर्देशक भन्छन्- कमेडी मात्र होइन, इमोसन पनि छ

काठमाडौँ- दिलिप रायमाझीको मुख्य भुमिका रहेको फिल्म ‘हेल्लो काँशिराम’ आगामी जेठ २ गतेदेखि देशभर प्रदर्शनमा आउने भएको छ। केही दिनअघि मात्र सार्वजनिक गरिएको फस्टलुक पोस्टरले दर्शकमाझ उत्सुकता बढाएको निर्माण पक्षको दाबी छ।

पोस्टरमा अभिनेता दिलिप रायमाझीलाई खसी बोकेर हिँडिरहेको देखाइएको छ, जसका कारण धेरैले यो फिल्म कमेडी जनरामा आधारित भएको अनुमान गरेका छन्। तर, फिल्मका लेखक तथा निर्देशक रिम विश्वकर्माले फिल्म कमेडी मात्र नभई गहिरो भावनात्मक कथासँग पनि जोडिएको प्रतिक्रिया दिएका छन्।

नेपाल क्लिक्ससँगको छोटो कुराकानीमा निर्देशक विश्वकर्माले भने, ‘यो केवल मनोरञ्जनात्मक कमेडी फिल्म मात्र होइन, यसमा सामाजिक सन्देश र भावनात्मक पाटो पनि समेटिएको छ। धेरै कुरा अहिले खुलाउन मिल्दैन, तर फिल्म हेर्दा दर्शकहरूले यसका गहिरा पक्षहरू बुझ्नेछन्।’

निर्देशक विकले फिल्मको टिजर चाँडै सार्वजनिक हुने र त्यस भिडियोमार्फत कथावस्तुको बारेमा थप जानकारी दिने बताए। हाल यस फिल्मको प्रचार-प्रसार थालिएको छ। सोही क्रममा उनी कीठमाडौँ, चितवनलगायतका जिल्लामा पत्रकार भेटघाटमा हिँडिरहेका छन्।

‘हेल्लो काँशिराम’मा रायमाझीसँगै सुरवीर पण्डित, रामचन्द्र अधिकारी, सुशील पोखरेल, उमेश राई (फुलन्देको आमा), भगेरी डन, नवज्योति रसाइली, सुमन खाँण, अजय न्यौपाने, सरोज केसी, उमेश मायालु जस्ता कलाकारको अभिनय देख्न सकिनेछ। त्यसैगरी, दर्शकहरूले प्रियंका कार्कीलाई विशेष भूमिकामा देख्न पाउनेछन्।

रेडलाइन फिल्म्स प्रालिको ब्यानरमा निर्माण भएको फिल्मका निर्माता पीबी थापा हुन्, भने छायांकन यम आलेले गरेका छन्। फिल्ममा सम्पादन तथा रंग संयोजन मित्र डी. गुरूङले गरेका हुन्। नृत्य निर्देशन कविराज गहतराज, द्वन्द्व निर्देशन शंकर महर्जन, संगीत संयोजन नरेन्द्र वियोगी र विपिन आचार्यले गरेका छन्। प्लेब्याक सिंगरहरूमा प्रताप दास, मेलिना राई, राजु परियार, किरण सुनार, अनिक गिरी लगायत छन्।

कमेडी र इमोसन मिसाएर बनाइएको ‘हेल्लो काँशिराम’ नेपाली दर्शकमाझ कत्तिको प्रभाव पार्छ भन्ने कुरा जेठ २ पछि थाहा हुनेछ। दर्शकहरू टिजर र ट्रेलरको प्रतीक्षामा छन्, जसले फिल्मको कथावस्तु अझ प्रस्ट पार्नेछ। फिल्ममा निर्माण टिमले डेढ करोड खर्च गरेको बुझिएको छ।