‘हेल्लो काँशीराम’को प्रमोसन गर्न अमेरिकादेखि फर्कँदै दीलिप रायमाझी

काठमाडौँ- अभिनेता दिलीप रायमाझी चलचित्र ‘हेल्लो काँशीराम’को प्रमोसनका लागि नेपाल आउने भएका छन्। उनी २ हप्ताभित्र नेपाल आइपुग्ने निर्माण कम्पनी रेडलाइन फिल्मस् प्रा.लीले जानकारी दिएको छ।

पारिवारिक कामका लागि दिलीप केही समय अघि अमेरिका प्रस्थान गरेका थिए। उनी अमेरिका गएको १ महिनामै नेपाल फर्किन लागेका हुन्। दिलीप नेपाल फर्किनासाथ केही मिडियामा अन्तर्वार्ता, भेटघाट र दर्शक भेटघाटमा व्यस्त हुने निर्माण कम्पनीले जनाएको छ। ‘हेल्लो काँशीराम आगामी जेठ २ गतेबाट देशभरका हलमा एकसाथ सार्वजनिक हुँदै छ।

‘हेल्लो काँशीराम’ केही दिन अघि मात्रै सेन्सर पास भएको थियो। यस चलचित्रलाई केन्द्रीय जाँच पास समिति (सेन्सर बोर्ड) बाट युनिभर्सल सर्टिफिकेट दिइएको छ। अब हरेक वर्गका दर्शकले ‘हेल्लो काँशीराम’ सजिलै हेर्न पाउनेछन्। त्यस्तै केही समय अघि चलचित्रको फस्ट लुक पोस्टर सार्वजनिक गरिएको थियो। उक्त पोस्टरमा दिलीप रायमाझीले बोको बोकेर भागिरहेको दृश्यले दर्शकको ध्यान तानेको छ। निर्माता, निर्देशक तथा अन्य कलाकारहरू भने प्रमोसनमा जुटिरहेका छन्।

रेडलाइन फिल्मस् प्रा.ली को ब्यानरमा निर्माण भएको यस फिल्मको लेखन तथा निर्देशन रिम विश्वकर्माले गरेका हुन्। रिम निकै पुराना निर्देशक हुन्। यस फिल्मलाई पी.बी. थापाले लगानी गरेका हुन्। यम आलेले खिचेको फिल्मको लगानी डेढ करोड पुगेको बुझिएको छ। फिल्मलाई मित्र डी. गुरुङले सम्पादन तथा रङ्ग संयोजन गरेका छन्।

फिल्ममा दिलीप रायमाझीसँगै वरिष्ठ कलाकारहरू सुरवीर पण्डित, रामचन्द्र अधिकारी, सुशील पोखरेल देखिने छन्। त्यस्तै, हालका चर्चित हास्य कलाकार उमेर राई (फुलन्देको आमा), भगेरी डन, नवज्योति रसाइली, सुमन खाँण, अजय न्यौपाने, सरोज केसी, उमेश मायालु, विवेश पुरी लगायतका कलाकारहरू पनि फिल्ममा देख्न पाइनेछ। यस फिल्ममा चर्चित अभिनेत्री प्रियङ्का कार्कीको समेत विशेष भूमिका रहेको निर्माण टिमले जनाएको छ। प्रियङ्का नेपाली फिल्म उद्योगको सफल अभिनेत्री भएकाले उनको उपस्थितिले फिल्मलाई थप बलियो बनाउने विश्वकर्माको भनाई छ।

चलचित्रको नृत्य निर्देशन कविराज गहतराजले गरेका हुन्। द्वन्द्व निर्देशन शङ्कर महर्जनले गरेका छन् भने सङ्गीत संयोजन नरेन्द्र वियोगी र विपिन आचार्यले गरेका छन्।

चलचित्रका गीतहरूमा प्रताप दास, मेलिना राई, राजु परियार, किरण सुनार र अनिक गिरीको आवाज रहेको जनाइएको छ। नेपाली साङ्गीतिक क्षेत्रका चर्चित गायक–गायिकाहरूको सहभागिताले फिल्मको सङ्गीत पक्षलाई थप आकर्षक बनेको निर्माण पक्षको भनाई छ। निर्देशक विश्वकर्माले यसअघि ‘नेपाली वीर, सम्झिराख है, रेलिमाई’ लगायतका फिल्महरू निर्देशन गरिसकेका छन्, उनका फिल्महरूले नेपाली मौलिक कथावस्तु, समाजका वास्तविकता प्रस्तुत गर्ने गरेका छन्। फस्ट लुक पोस्टर र प्रदर्शन मिति एकैसाथ सार्वजनिक गरेर प्रचार थालेको फिल्मको टिजर र गीत छिट्टै सार्वजनिक गर्ने निर्माण टिमको तयारी छ।