टिम विजयको विजयीभाव : बोलेर हैन, काम गरेर देखाउँछौँ [तस्बिरहरू]

काठमाडौँ- नेपाल बार एसोसिएसनका नवनिर्वाचित अध्यक्ष वरिष्ठ अधिवक्ता प्राडा विजयप्रसाद मिश्रले न्यायपालिकाका विकृति हटाउनका लागिपर्ने बताएका छन्।न्यायपालिकालाई स्वच्छ बनाउन बारले भूमिका खेल्ने उनको भनाइ छ।

अध्यक्षमा निर्वाचित मिश्रले चुनावमा अगाडि सारेका एजेन्डा कार्यान्वयन गर्ने बताएका छन्। ‘नेपाल बारमा मैले धेरै काम गर्नुपर्ने छ। बोलेर हैन, काम गरेर देखाउनको लागि हाम्रो टिम नै लागिपर्ने छौँ,’ उनले भने, ‘संविधान संशोधन, न्यायपालिकाको सुधार, न्यायपरिषद् संरचनाको सुधार, न्यायपरिषद्को कार्यपद्धतिमा सुधार हाम्रो योजना रहेको छ। न्यायपालिकामा रहेका विकृति, विसंगति हटाउनको आवश्यक कार्य गर्नेछौं। न्यायपालिकामा देखिएका समस्या सुधार गर्नको लागि हामी लाग्नेछौँ।’

नेपाल बार एसोसिएसनका लागि भएको निर्वाचनको बिहीबार मतपरिणाम घोषणा भएको हो। अध्यक्ष उम्मेदवार मिश्रले ५ हजार ५२ मत प्राप्त गरे भने उनका प्रतिस्पर्धी वरिष्ठ अधिवक्ता रमणकुमार श्रेष्ठले २ हजार ६२१ मत प्राप्त गरेका थिए। श्रेष्ठले माओवादी केन्द्र र रास्वपाका कानुन व्यवसायी संगठनले गठबन्धन बनाएका थिए।

नेपाल बारका आठै उपाध्यक्षमा मिश्र प्यानलकै उम्मेदवार विजयी बनेका छन्। कोशीबाट पदमप्रसाद लिम्बु, मधेसबाट अजयशंकर झा, बागमतीबाट तेजबहादुर रावल, गण्डकीबाट भुपेन्द्र खनाल, लुम्बिनीबाट कृष्णप्रसाद पोख्रेल, कर्णालीबाट विवशकुमार बस्नेत र सुदूरपश्चिमबाट सिद्धराज ओझा उपाध्यक्षमा निर्वाचित भए।

महासचिवमा मिश्र प्यानलकै वरिष्ठ अधिवक्ता केदारप्रसाद कोइराला निर्वाचित हुँदा कोषाध्यक्षमा पनि मिश्र प्यानलकै वरिष्ठ अधिवक्ता जगतबहादुर कार्की निर्वाचित भए। बाँकी सबै सदस्य पदमा पनि मिश्र प्यानलले बाजी मारेको छ।

तस्बिरहरू