संघीय संसद्का दुवै सदनको संयुक्त बैठक बस्दै

काठमाडौं– प्रतिनिधिसभा र राष्ट्रिय सभाको संयुक्त बैठक आज बस्ने कार्यतालिका छ। बैठक बिहान ११ बजे संघीय संसद् भवन नयाँ बानेश्वरमा बोलाइएको हो।

बैठकमा नियमावली मस्यौदा समितिको प्रतिवेदनमाथि दफाबार छलफल र पारित गर्ने कार्यसूची रहेको छ। दुवै सदनका संयुक्त बैठकमा संयुक्त समिति (कार्यसञ्चालन) नियमावली मस्यौदा समिति सभापति ध्रुवबहादुर प्रधानले संघीय संसद्को बैठक र संयुक्त समिति (कार्यसञ्चालन) नियमावली २०८० को मस्यौदा प्रतिवेदन संसद्मा प्रस्तुत गर्नेछन्।

मस्यौदा प्रतिवेदनमाथि आएका संशोधनलाई क्रमशः निर्णयार्थ प्रस्तुत गरिनेछ। संशोधन निर्णयार्थ प्रस्तुत गरेलगत्तै नियमावली पारित गर्ने कार्यसूची रहेको संसद् सचिवालयले बताएको छ। आज दिउँसो १ बजे बस्ने प्रतिनिधिसभा बैठकमा अर्थमन्त्री डा. प्रकाशशरण महतले चालू वर्षको आर्थिक सर्वेक्षण पेस गर्ने कार्यसूची छ।

प्रतिनिधिसभाले शनिबार आगामी आर्थिक वर्षको नीति तथा कार्यक्रम पारित गरिसकेको छ। १५ जेठमा बजेट ल्याउनुपर्ने संवैधानिक व्यवस्था छ। आजै राष्ट्रिय सभाको बैठक पनि दिउँसो १ बजेर १ मिनेटमा बस्ने संसद् सचिवालयले जनाएको छ।