डाक्टर बस्ने होस्टलमा ठोक्किएको थियो जहाज

अहमदाबाद- अहमदाबादस्थित सरदार वल्लभभाई पटेल अन्तर्राष्ट्रिय विमानस्थल नजिकै भएको जहाज दुर्घटनामा परी एक सय जनाको मृत्यु भएको छ। विमानस्थलबाट लन्डनका लागि उडेको एयर इन्डियाको बोइङ ७८७-८ ड्रिमलाइनर जहाजले उडान सुरु गरेको केही क्षणमै दुर्घटनामा पर्दा उनीहरुको मृत्यु भएको दैनिक भाष्करले उल्लेख गरेको छ।

भारतीय समयअनुसार दिउँसो १:३८ बजे टेकअफ गरेको फ्लाइट नम्बर एआई‑१७१ जहाज उडान भरेको करिब १५ सेकेन्डमै मेघानी नगरस्थित सिभिल अस्पताल नजिकै रहेको मेडिकल इन्टर्नहरूको होस्टेलमा खसेको हो। दुर्घटनापछि आकाशमा बाक्लो धुवाँ देखिएको र ठूलो आवाजसहित आगलागी भएको प्रत्यक्षदर्शीहरूले बताएका छन्।

विमानमा २४२ जना सवार थिए, जसमा २३० यात्रु र १२ चालक दल सदस्य रहेका थिए। सवार यात्रुहरूमध्ये १६९ भारतीय, ५३ बेलायती, ७ पोर्चुगल र १ जना क्यानाडाका नागरिक थिए।

भारतीय जनता पार्टीका वरिष्ठ नेता तथा पूर्व गुजरात मुख्यमन्त्री विजय रूपाणी समेत विमानमा सवार थिए। उनी आफ्नी छोरीलाई भेट्न लन्डन जाँदै थिए।

जहाज ठोक्किउको इन्टर्न डाक्टरको होस्टेलमा ५०–६० जना बस्दै आएका थिए। सय जनाको मृत्यु भएको भनिएपनि कति जना इन्टर्न डाक्टर र कति जना जहाजका यात्रु थिए भन्ने खुलेको छैन। दुर्घटनामा परी १५ जना चिकित्सक घाइते भएको समाचारमा उल्लेख छ।

दुर्घटनाको पूर्ण विवरण आउन बाँकी छ। घटनाका सम्बन्धमा भारतको नागरिक उड्डयन महानिर्देशालय (डीजीसीए) र विमान दुर्घटना अनुसन्धान ब्युरो (एएआईबी) ले संयुक्त रूपमा अनुसन्धान सुरु गरेका छन्।

दुर्घटनापछि ७ भन्दा बढी दमकल तथा एम्बुलेन्सहरू परिचालन गरिएको छ। दुर्घटनापछि अहमदाबाद विमानस्थलबाट सबै उडानहरू स्थगित गरिएका छन्।

गृहमन्त्री अमित शाह र गुजरातका मुख्यमन्त्री भूपेन्द्र पटेलले घटनास्थलमा पुगी राहत तथा उद्धार कार्यलाई तीव्र बनाउन निर्देशन दिएका छन्। मुख्यमन्त्री पटेलले मृतकप्रति श्रद्धाञ्जली अर्पण गर्दै पीडित परिवारलाई राज्य सरकारले आवश्यक सबै सहयोग उपलब्ध गराउने बताएका छन्।