प्युठानमा एकल महिलाले सुरु गरे ‘रातो अबिर अभियान’ [तस्बिरहरू]

प्युठान-  प्युठानका महिलाले ‘रातो अबिर अभियान’ सुरुवात गरेका छन्। सामाजिक विकास डिभिजन कार्यालयले एकल महिलाहरूका लागि आयोजना गरेको क्षमता विकास कार्यक्रमबाट करिब १ सय ५० जना एकल महिलाले यो अभियान सुरु गरेका हुन्।

श्रीमान् गुमाएर एकल जीवन बिताइरहँदा पनि सेतो पहिरनमा हिँड्नुपर्दा समाजमा अपहेलित हुनुपरेको बताउँदै एकल महिलाहरूले रातो अबिर अभियान चलाएका हुन्। रातो रङ श्रीमानको उपहार नभएर प्रकृतिको उपहार भएकोले एकल हुँदा रातो रङ प्रयोग गर्न हुँदैन भन्ने सामाजिक कु-संस्कार तोड्न महिलाहरू जुर्मुराएका छन्। कस्तो रङ पहिरन गर्ने भन्ने महिलाहरूलाई स्वतन्त्रता हुनुपर्ने कार्यक्रमका सहभागीहरूले बताए।

एकल महिलाहरूको क्षमता विकास गर्ने उद्देश्यले आइतबार र सोमबार प्यूठानको जुम्रीमा आयोजित कार्यक्रममा सहभागी एकल महिलाहरूले आफ्ना दुःख, कठिनाइ र समाजबाट भएका हेपाइका फेहरिस्त सुनाएका थिए। सवारीसाधनमा चढ्दा समेत साइत बिग्रिने भन्दै चालकले नचढाएको दुखेसो उनीहरूले पोखे।

वैदेशिक रोजगारीको सिलसिलामा श्रीमान् गुमाएर एकल जीवन बिताइरहेकी नौ बहिनी गाउँपालिकाकी एक महिलाले गहभरि आँसु पार्दै कार्यक्रमकी प्रमुख अतिथि लुम्बिनी प्रदेश सांसद निमा गिरीको अगाडि दुःख पोखिन्।

समाजले एकल महिलाहरूलाई तिरस्कृत गरिरहेको, राजनीतिक दलहरूले पनि महिलाहरूको संवैधानिक हक कुण्ठित गरिरहेकोले `रातो अबिर’ अभियानसँगै अधिकारको उपभोगमा लाग्ने एकल महिलाहरूले उद्घोष गरेका छन्।

एकल महिलाको उक्त अभियान अब प्युठानका ६४ वडा र सिङ्गो लुम्बिनी प्रदेशभरि पुर्‍याउनुपर्ने लुम्बिनी प्रदेश सभामुख तुलाराम घर्ती मगरले बताए। लुम्बिनी प्रदेश सांसद निमा गिरीले प्रमुख जिल्ला अधिकारीलाई एकल महिलाका समस्यालाई प्रो-एक्टिभ भएर चासो दिन र हिंसा हुन नदिन महत्त्वपूर्ण भूमिका निर्वाह गर्न अनुरोध गरिन्।

कार्यक्रममा सहभागीहरू २१ वर्षमै पति बितेकादेखि ६० वर्षसम्मका थिए। आफूजस्तै थुप्रै महिला भेट्न सबै खुसी भएका थिए।