आजदेखि खुल्दै गाजाको राफा नाका, छ सय सहायता सवारी प्रवेश गर्ने तयारी

एजेन्सी: इजरायलले गाजाको राफा नाका बुधबारदेखि पुनः खोल्ने निर्णय गरेको छ, जसबाट इजिप्ट हुँदै गाजामा मानवीय सहयोगका सामग्री पठाइनेछन्। इजरायली सार्वजनिक प्रसारण संस्थाका अनुसार संयुक्त राष्ट्रसंघ, अन्तर्राष्ट्रिय संस्था, निजी क्षेत्र र दातृ राष्ट्रहरूले पठाउने करिब ६ सय सवारीसाधन गाजातर्फ पठाइने तयारी भइरहेको छ।

गाजामा दुई वर्षदेखि जारी द्धन्द्धका कारण खाद्यान्न, औषधि र अन्य आधारभूत सेवाको गम्भीर अभाव भएको छ। संयुक्त राष्ट्रसंघ र विभिन्न सहयोगी संस्थाहरूले बारम्बार राफा नाका खोल्न आग्रह गर्दै आएका थिए। संयुक्त राष्ट्रसंघले गत साउन महिनामा गाजामा दुर्भिक्ष भएको घोषणा गरे पनि इजरायलले त्यो दाबी अस्वीकार गरेको थियो।

राफा नाका खोल्ने निर्णय इजरायली राजनीतिक नेतृत्वको सहमतिमा गरिएको हो। यो निर्णय हमासले मंगलबार राति थप चार जना बन्धकको शव फिर्ता गरेपछि लिइएको हो। हालै सुरु भएको युद्धविराम सम्झौताअनुसार हमासले सबै बन्धकहरू जिउँदो वा मृत– ७२ घण्टाभित्र फिर्ता गर्नुपर्ने शर्त रहेको छ।

हालसम्म हमासले २० जना जिउँदो बन्धकहरू फिर्ता गरिसकेको छ, तर २८ जना मृतकहरूमध्ये केवल ८ जनाको मात्र शव फिर्ता गरिएको छ।