वाणिज्य बैंकहरूको नाफा खुम्चिएर १९ अर्ब ३७ करोडमा सीमित, ग्लोबल आइएमईको सबैभन्दा बढी

काठमाडौँ: चालू आर्थिक वर्ष  २०८२/८३ को पहिलो चार महिनामा वाणिज्य बैंकहरूको नाफा १३.११ प्रतिशत खुम्चिएको छ।

नेपाल राष्ट्र बैंकको तथ्यांकअनुसार चालू आर्थिक वर्षको कात्तिकसम्म सञ्चालनमा रहेका २० वाणिज्य बैंकहरूले साढे १९ अर्ब ३७ करोड ५० करोड रुपैयाँमा सीमित भएको छ। गत वर्ष पहिलो चौमासमा वाणिज्य बैंकहरूको नाफा २२ अर्ब २९ करोड ९ लाख रुपैयाँ रहेको थियो। चालु आवमा गत वर्षको सोही अवधिको तुलनामा बैंकहरूको नाफा दुई अर्ब ९२ करोड रुपैयाँ घटेको राष्ट्र बैंकले जनाएको छ।

आर्थिक गतिविधि सुस्त हुँदा बैंकहरूको निष्क्रिय कर्जा बढेर कर्जा बढ्दा प्रोभिजन बढी गर्दा नाफामा असर परेको हो। बैंकहरूको निष्क्रिय कर्जा बढेर ५.२६ प्रतिशत पुगेको छ। यसबीचमा बैंकहरूले दुई खर्ब ७० अर्ब २१ करोड ६० लाख रुपैयाँ प्रोभिजन गरेका छन्।

गत भदौ २३ र २४ भएको जेनजी आन्दोलनपछि  कर्जा प्रवाह हुन नसक्दा बैंकहरूको नाफामा गिरावट आएको हो। चालू आर्थिक वर्षको चार महिनाको अवधिमा ग्लोबल आईएमई बैंकले सबैभन्दा धेरै २ अर्ब ५१ करोड रुपैयाँ खुद नाफा कमाएको छ।

त्यस्तै नबिल बैंकले २ अर्ब ४६ करोड रुपैयाँ खुद नाफा कमाएको छ। यस अवधिमा सिटिजन्स बैंकको खुद नाफा सबैभन्दा कम अर्थात् १ करोड ६४ लाख रहेको छ। त्यस्तै कृषि विकास बैंकले ७ करोड ४९ लाख खुद नाफा कमाएको छ।

यसैगरी, चालु आर्थिक वर्षको पहिलो चार महिनामा स्ट्याण्डर्ड चार्टर्ड बैंकले ९१ करोड ५८ लाख, हिमालयन बैंकले ८२ करोड ३२ लाख, नेपाल बैंकले ८० करोड ९८ लाख, सानिमा बैंकले ७७ करोड ९२ लाख, प्रभु बैंकले ७३ करोड ७७ लाख, नेपाल एसबीआई बैंकले ६७ करोड २० लाख, सिद्धार्थ बैंकले ६६ करोड २७ लाख, नेपाल इन्भेष्टमेन्ट मेगा बैंकले ६३ करोड ९ लाख, लक्ष्मी सनराइज बैंकले ६२ करोड ८१ लाख रुपैयाँ नाफा गरेका छन्।

यस्तै माछापुच्छ्रे बैंकले ६० करोड ९९ लाख, कृषि विकास बैंकले ७ करोड ४९ लाख, एनआइसी एशिया बैंकले ३ करोड ४३ लाख रूपैयाँ, सिटिजन्स बैंकले १ करोड ६४ लाख रुपैयाँ नाफा आर्जन गरेका छन्।