बालेनले रविको नेतृत्व नस्वीकार्ने, नयाँ शिराबाट छलफल सुरु

काठमाडौँ: काठमाडौँ महानगरपालिकाका मेयर बालेन्द्र शाह (बालेन) र राष्ट्रिय स्वतन्त्र पार्टी (रास्वपा) का सभापति रवि लामिछानेबीच सोमबार साँझदेखि मध्यरातिसम्म करिब ६ घण्टा लामो छलफल भयो। रास्वपाका केही नेताले भेटलाई सकारात्मक दाबी गरे पनि स्रोतहरूका अनुसार उक्त छलफल ठोस समझदारीमा भने पुग्न सकेको थिएन। बरु असहमतिका कारण त्यही बैठकपछि बालेन छुट्टै दल निर्माण गरेर अघि बढ्ने मनस्थितिमा पुगेका छन्।

कमलपोखरीस्थित रास्वपा नेता असिम शाहको कार्यालयमा भएको छलफलमा आगामी फागुन २१ गते तोकिएको प्रतिनिधिसभा निर्वाचनमा सहकार्य गर्ने सम्भावनाबारे मुख्य रूपमा कुराकानी भएको थियो। छलफलमा रवि र बालेनसहित रास्वपा उपसभापति डीपी अर्याल, असिम शाह, आसिफ शाहलगायत सहभागी थिए।

छलफल सौहार्दपूर्ण वातावरणमै भए पनि शक्ति बाँडफाँट र नेतृत्वसम्बन्धी प्रस्तावमा कुरा नमिलेको स्रोतको भनाइ छ। बालेनले नेतृत्वको विषयमा फरक प्रस्ताव राखेका थिए भने लामिछाने उक्त प्रस्तावमा सहमत नभएपछि कुनै ठोस सहमति बिना नै बैठक सकिएको बताइएको छ। स्रोतका अनुसार बैठकपछि दुवै जना एउटै गाडीमा बाहिरिएका थिए, तर त्यसलाई राजनीतिक समझदारीको संकेतका रूपमा लिइनु नहुने बताइन्छ।

लामिछानेमाथि देशभरका विभिन्न सहकारीको रकम अपचलनको आरोपमा ५ जिल्लामा मुद्दा छ। उनी शुक्रबार मात्र नख्खु कारागारबाट धरौटीमा रिहा भएका थिए। त्यसपछि लामिछाने राजनीतिक भेटघाट तीव्र पारेका थिए।

बालेन निकट स्रोतकाअनुसार सोमबारको भेटमा बालेनले उक्त मुद्दाका विषयमा कुरा उठाएका थिए। लामिछानेमाथि विभिन्न जिल्लामा सहकारी ठगीको मुद्दा रहेको र अहिले पनि थुनाबाहिर बसेर पुर्पक्ष गरिरहेकाले लामिछानेको नेतृत्व स्वीकार नगर्ने मुडमा बालेन छन्। सोमबार बालेनले रास्वपाको नेतृत्व बदल्न प्रस्ताव गरेका थिए। लामिछानेले बालेनलाई प्रधानमन्त्रीका रूपमा अगाडि बढाउने र नेतृत्व आफूसँग राख्ने प्रस्ताव गरेका थिए। तर लामिछाने उक्त प्रस्तावमा सहमत नभएपछि बालेन आफैँ दल निर्माणको तयारीमा जुटेका हुन्।

व्यवहारिक सहकार्यका सवालमा कुनै ठोस सहमति नजुटेको अवस्थामा लामिछानेले मंगलबार चितवन पुगेर दिएको अभिव्यक्तिले बालेन झन् बिच्किएका छन्। बालेनलाई प्रधानमन्त्रीका रूपमा अगाडि बढाउने सहमति भएको हो भन्ने सञ्चारकर्मीको सवालमा लामिछानेले त्यस विषयमा छलफल नै नभएको बताएका थिए। उनले भनेका थिए, ‘हामी त्यसमा प्रवेश गरेका छैनौँ। पहिले त थाहा पाउनुप‍र्‍यो। कुराकानी हुनुपर्‍यो। के कस्तो छ भन्ने बुझ्नु प‍र्‍यो। एकअर्कासँग परिस्थितिबारे जानकारी लिनुप‍र्‍यो। विस्तारै राजनीतिक कुरामा हामी प्रवेश गर्छौं।’

आफैँले प्रधानमन्त्रीका लागि अफर गरेर सार्वजनिक रूपमा बोली फेरेपछि लामिछानेको भर नभएको निष्कर्ष बालेन समूहको छ। ‘प्रधानमन्त्रीको अफर उतैबाट आएको हो। तर अहिले पनि उहाँ आरोपित हो। त्यसैले नेतृत्वका विषयमा उहाँ(बालेन)ले प्रश्न उठाउनुभएको थियो। त्यसमा सहमति नभई सहकार्य हुँदैन,’ बालेननिकट स्रोतले बतायो।

रास्वपासँग सहमति नजुटेपछि बालेन आफैँ दल निर्माण गर्ने तयारीमा छन्। उनी लौरो चुनाव चिह्न लिएर निर्वाचन आयोगमा दर्ता भएको देश विकास पार्टीको नेतृत्व  हाँक्ने तयारीमा लागेका हुन्। देश विकास पार्टी निर्वाचन प्रयोजनका लागि लौरो चुनाव चिह्न लिएर आयोगमा दर्ता भैसकेको छ।

बुधबार दिनभर नयाँ पुराना नेताहरूसँग दल निर्माणका लागि भेटमा व्यस्त भए। बुधबार भगवान कोइराला, सीके राउत, मिलन पाण्डे, रेशम चौधरी, ज्ञानेन्द्र शाहीलगायतसँग छलफल गरेका उनी बिहीबार पनि बिहानैदेखि राजनीतिक भेटघाटमा व्यस्त रहेको उनीनिकट स्रोतले जानकारी दियो।

बालेन आफैँ दल निर्माण गरेर संसदीय निर्वाचनमा जाने तयारीमा जुटेपछि बिहीबार दिउँसो लामिछाने बालेनलाई भेट्न कुपोण्डोलस्थित कुमार बेनको घरमा पुगेका छन्।