यी हुन् रास्वपाको समानुपातिक सूचीमा परेका चर्चित ६ व्यवसायी

काठमाडौँ: राष्ट्रिय स्वतन्त्र पार्टी (रास्वपा)ले सामाजिक सञ्जालमा भाइरल, गायक गायिका, कलाकार, मोडलदेखि राज्यसत्तासँग सोझो पहुँच भएका व्यवसायीहरूलाई समेटेर समानुपातिकको बन्दसूची तयार गरेको छ। ११० जनाको बन्दसूचीमा प्रभावशाली अनुहारहरूको वर्चस्व देखिन्छ।

रास्वपाको समानुपातिक बन्दसूचीमा विभिन्न व्यवसायीहरू पनि परेका छ्न्। रास्वपाको समानुपातिक बन्दसूचीमा आईएमई ग्रुपका अध्यक्ष तथा नेपाल उद्योग वाणिज्य महासंघका अध्यक्ष चन्द्र ढकालका छोरा सचिन ढकाल छन्। उनको नाम खस आर्य क्लस्टरको दोस्रो नम्बरमा छ। उनी चितवनबाट समानुपातिक उम्मेदवारको सूचीमा परेका हुन्। रास्वपाको समानुपातिक सूचीमा चितवनबाट सर्वाधिक २१ जनाको नाम रहेको छ। यो रास्वपा सभापति रवि लामिछानेको निर्वाचन क्षेत्र पनि हो।

सचिन फुटबल चितवन क्लबका अध्यक्ष हुनुका साथै पर्यटन र होटल व्यवसायमा संलग्न छन्। उनले इला ब्रान्डको होटल सञ्चालन गर्दै आएका छन्। उनी काठमाडौँ महानगरपालिकाका मेयर बालेन्द्र शाहको कोटाबाट समानुपातिक सूचीमा राखिएका हुन्।

यसैगरी नेपालसहित विदेशमा पनि चर्चि ब्रान्ड गोल्डस्टार जुत्ताचप्पल उत्पादन गर्दै आएको किरण सुज म्यानुफ्याक्चर्सकी कार्यकारी निर्देशक विदुषी राणाको नाम पनि समानुपातिकमा परेको छ। उनी पनि चितवनबाट समानुपातिक सूचीमा परेकी हुन्। उनको नाम खस आर्य महिला क्लस्टरको दोस्रो नम्बरमा छ।

यस्तै पूर्वअर्थमन्त्री लिमा अधिकारी (आचार्य) को नाम पनि समानुपातिक सूचीमा छ। उनको नाम विदुषीपछि तेस्रो नम्बरमा खस आर्य महिलामा छ। उनी काठमाडौँको बानेश्वरमा रहेको सेप अप स्लिमिङ र वेलनेस सेन्टरकी मालिक हुन् भने उनी नेपाल इन्फ्रास्ट्रक्चर बैंक लिमिटेड (निफ्रा)को सञ्चालक समिति सदस्य पनि रहेकी छन्। डिशहोमका प्रबन्ध निर्देशक तथा कामना विकास बैंकका अध्यक्ष सुदीप आचार्य उनका श्रीमान् हुन्।

विवेकशील साझा पार्टीबाट रास्वपा प्रवेश गरेकी समीक्षा बाँस्कोटाको नाम पनि समानुपातिक सूचीमा अटाएको छ। उनी विशेषगरी चिया उद्यम गरिरहेको बाँस्कोटा ग्रुपकी अध्यक्ष हुन्। उनी राष्ट्रिय सहकारी महासंघका संस्थापक अध्यक्षसमेत रहेका व्यवसायी दीपकप्रकाश बाँस्कोटाकी हुन्। नेपाली कांग्रेसको राजनीति गरेका दीपकप्रकाश बाँस्कोटाले गृहराज्यमन्त्रीको जिम्मेवारी पनि सम्हालेका थिए।

२०१९ की मिस नेपाल समेत रहेकी मोडल अनुष्का श्रेष्ठ पनि रास्वपाको समानुपातिक सूचीमा परेकी छन्। उनको नाम आदिवासी जनजाति क्लस्टरको चौथो नम्बरमा छ। उनी स्थानीय डेजर्ट ब्रान्ड माकुसी मिठाइकी सञ्चालक हुन्।

यस्तै रास्वपाले समानुपाति सूचीमा राखेका डा राम लामा ऊर्जा व्यवसायी हुन्। उनी ग्रिन हाइड्रोजन ल्याबका कोअर्डिनेटर रहेका छन्। उनको नाम आदिवासी जनजातिक क्लस्टरको पहिलो नम्बरमा छ।