तोडफोडकारीको पहिचान भए पनि कारबाही गर्न सरकार गम्भीर देखिएन: माधव नेपाल

काठमाडौँ: नेपाली कम्युनिष्ट पार्टीका सहसंयोजक माधवकुमार नेपालले भदौ २४ गतेको घटनामा तोडफोड गर्ने तोडफोडकारीको पहिचान भएपनि कारबाही नभएको बताएका छन्। बुधबार नेपाल उद्योग वाणिज्य महासंघले बुधबार आयोजना गरेको ‘शान्ति, स्थायित्व र समृद्धिका लागि सहकार्य’ विषयक संवाद कार्यक्रममा उनले २४ गतेको घटना अत्यन्तै आपत्तिजनक भए पनि त्यो घटनामा सहभागि मानिसको पहिचान भएपनि कारबाही नहुनु झन् बढी गम्भीर विषय भएको बताए।

उनले यस्तो कामले सरकारमाथि पनि प्रश्न खडा भएको भन्दै प्रधानमन्त्रीको ध्यान आकर्षण गरेका छन्। उनले भने, ‘२४ गतेको घटना जुन भएको छ। त्या अत्यन्तै आपत्तिजनक र दण्डनिय छ। म प्रधानमन्त्रीलाई भन्न चहान्छु त्यसप्रति सरकार गम्भीर देखिएन, उदार देखिएको छ। यो उदार देखिनु धेरै नै गम्भीर कुरा पनि हो। भिडिओले देखाइरहेको छ, तोडफोड गर्ने तोडफोडकारी को को हुन् थाहा भैरहेको छ तर गिरफ्तार हुँदैनन्, दण्डित हुँदैनन्। चोरी गरेर लगेर राखेको छ, चोरीको सामान देखिएको छ तर त्यसलाई कुनै सजाय दिइँदैन।’

यस्तै, उनले दुई तिहाइ सरकार छ भनेर स्थायित्व आयो भन्ने अवस्था पनि नरहेको भन्दै यसले घमण्डी नेताहरू, सत्ताको दुरुपयोग गर्ने प्रवृत्तिको विकास र नीतिको निरन्तरतामा समस्या खडा गर्ने प्रवृत्ति बढ्ने बताए।

वर्तमान सरकारको प्रमुख दायित्व शान्तिपूर्ण तरिकाले निर्वाचन सम्पन्न गर्ने कुराको साथै केही संरचनाहरुमा सुधारमा समय दिनुपर्ने रहेको पनि उनको भनाई छ।