यता विशेष महाधिवेशनका लागि हल बुक, उता गुरुराज घिमिरे सप्ताह भन्दै पन्छिए

नेपाली कांग्रेसले विशेष महाधिवेशन पक्षले महाधिवेशन आयोजनाको तयारी तीव्र पारेको छ। विशेष महाधिवेशन पक्षधरहरूले भृकुटीमण्डपमा हल पुष २७-२८ बुकिङ गरेको कांग्रेसका युवा नेता लेखनाथ पोखरेलले जानकारी दिए। उनले बुधबार भृकुटीमण्डप पुगेर हल बुकिङ गरिएको बताए।

पार्टीभित्र महामन्त्रीद्वय गगन थापा र विश्वप्रकाश शर्मालगायत नेताहरूले विशेष महाधिवेशनलाई निरन्तर जोड दिँदै आएका छन्। यसअघि ५४ प्रतिशतभन्दा बढी महाधिवेशन प्रतिनिधिहरूले केन्द्रीय कार्यालयमा हस्ताक्षर बुझाएर विशेष महाधिवेशनको माग गरेका थिए।

नियमित महाधिवेशनको मिति तोकिए पनि हुन नसक्ने अवस्था देखिएपछि महामन्त्रीहरूले विशेष महाधिवेशन बाध्यकारी भएको बताउँदै आएका छन् । महामन्त्री थापाले पुस मसान्तभित्र विशेष महाधिवेशन आह्वान गर्ने बाटोमा पार्टी अगाडि बढेको स्पष्ट पारेका छन्।

यसैबीच विशेष महाधिवेशन पक्षका एक अगुवा नेता गुरुराज घिमिरले भने आजै मात्र प्रात:स्मरणीय पितृहरुको श्रद्धा, सम्मान र स्मरणस्वरुप आजबाट श्रीमद्भागवत सप्ताह महायज्ञ प्रारम्भ भएकाले एकहप्तासम्म फोनमा कुरा गर्न कठिनाई हुने व्यहोरा आफ्नो सामाजिक सञ्जाल मार्फत् अवगत गराएका छन्। उनले व्यवहारिक असमर्थता भन्दै कसैको फोन नउठाउने जानकारी दिएपछि विशेष महाधिवेशनमा नेता शेखर कोइराला पक्ष पछि हटेको अनुमान कांग्रेसवृतमा गरिएको छ।