राजीनामा नदिई प्रतिनिधिसभा सदस्यका लागि मनोनयन दर्ता गर्दै बालेन्द्र, मेयर पद के हुन्छ?

काठमाडौँ: माघ ४ गते काठमाडौँ महानगरपालिकाको मेयर पदबाट राजीनामा दिई प्रतिनिधिसभा निर्वाचनका लागि प्रचारप्रसारमा जुट्ने तयारी गरेका बालेन्द्र साह अन्तत: राजीनामा नदिने मुडमा पुगेका छन्। राष्ट्रिय स्वतन्त्र पार्टी (रास्वपा)बाट आगामी निर्वाचनपछि प्रधानमन्त्रीको क्यान्डिडेटका रूपमा अघि सारिएका साह झापा ५ बाट चुनाव लड्दैछन्।

साहले गत पुस १३ गते सभापति रवि लामिछानेसँग ७ बुँदे सम्झौता गर्दै रास्वपा प्रवेश गरेका थिए। सहमतिअनुसार साहले रास्वपाको नेतृत्वमा रविलाई र रविले आगामी फागुन २१ मा हुने निर्वाचनपछिको प्रधानमन्त्रीमा बालेन्द्रलाई स्वीकार गरेका थिए।

जसअनुसार माघ ४ गते मेयरबाट राजीनामा दिएर माघ ५ गते रविसँगै बालेन्द्र मधेश प्रदेशको जनकपुरबाट चुनावी प्रचारमा हिँड्ने तयारीमा थिए। यद्यपि, उनी राजीनामा नदिई प्रतिनिधिसभा सदस्यका लागि मनोनयन दर्ता गर्ने तयारीमा लागेका छन्।

यसैक्रममा उनी  आइतबार पहिलोपटक रास्वपाको पार्टी कार्यालय पुगेका छन्। रास्वपाको केन्द्रीय समिति बैठकअघि बालेन पार्टी कार्यालय पुगेकोमा नेता कार्यकर्ताहरूले उनको स्वागत गरेका छन्।

के छ आचारसंहितामा?
राजीनामा दिएर प्रचारप्रसारमा लाग्ने तयारी गरेका बालेन्द्रले मेयर पदबाट राजीनामा नदिए पनि प्रतिनिधिसभा उम्मेदवार बनेपछि स्वत: पदमुक्त हुनेछन्। 

गएको पुस १२ गते आयोगद्वारा स्वीकृत निर्वाचन आचारसंहिता २०८२ ले राष्ट्रियसभा, प्रदेशसभा, नगर वा गाउँसभाका सदस्य पदमा बहाल रहेका व्यक्ति प्रतिनिधिसभा सदस्य निर्वाचनमा उम्मेदवार भएमा मनोनयन दर्ता भएपछि त्यस्तो पदबाट स्वतः पदमुक्त मानिने व्यवस्था गरेको छ।