१४ अर्ब लगानीमा सुर्खेतमा सूर्यतारा सिमेन्ट सञ्चालनमा आउँदै, क्षमता दैनिक छ हजार टन

काठमाडौँ: कर्णाली प्रदेशको सुर्खेतमा ठूलो लगानीमा नयाँ सिमेन्ट उद्योग सञ्चालनमा आउने भएको छ। व्यवसायी मुकुन्द तिमिल्सिनाले प्रवर्द्धन गरेको सूर्यतारा सिमेन्ट उद्योगको शिलान्यास गरिएको छ।

उद्योग स्थापनाका लागि १४ अर्ब २७ करोड रुपैयाँ लगानी हुने अनुमान गरिएको छ। सिमेन्ट उत्पादनका लागि आवश्यक पूर्वाधार निर्माणको काम सुरु भइसकेको छ। यो उद्योग कर्णालीसहित सुदूरपश्चिमका लागि पनि गौरवान्वित पहिलो ठूलो सिमेन्ट उद्योग भएको तिमिल्सिनाले बताए।

२०७८ चैत १७ मा तत्कालिन प्रधानमन्त्री शेरबहादुर देउवाको अध्यक्षतामा बसेको लगानी बोर्डको ५०औँ बैठकले सूर्यतारा सिमेन्ट उद्योग स्थापनाका लागि लगानी स्वीकृत गरेको थियो। सूर्यतारा सिमेन्टका साथै कच्चा वस्तु क्लिंकर उत्पादन गर्ने भएको छ।

सिमेन्ट उद्योग र खानीसम्म पुग्न पहुँचमार्ग र बिजुली आपूर्ति पूर्वाधार बनाउने जिम्मा सरकारले लिएको छ। कर्णाली प्रदेशमा उत्पादन गरेर सुदूरपश्चिम क्षेत्रमा सिमेन्ट आपूर्ति गर्न सुर्खेतको पञ्चपुरी गाउँपालिका चौकुनामा कारखाना स्थापनाका लागि बोर्डले सूर्यतारालाई स्वीकृति दिएको हो।

सिमेन्ट उद्योगका लागि कैलालीको लम्कीचुहाबाट २६ किलोमिटर लामो १३२ केभी प्रसारण लाइनमार्फत बिजुली आपूर्ति गर्नुपर्ने हुन्छ। उद्योगलाई २० मेगावाटभन्दा बढी बिजुली आवश्यक पर्नेछ।

सूर्यताराले सिमेन्ट उद्योग स्थापना गर्न ४० बिघा जग्गा खरिद गरिसकेको छ। दैनिक तीन हजार टन क्लिंकर र तीन हजार टन (६० हजार बोरा) सिमेन्ट उत्पादन गर्ने उद्योगको लक्ष्य छ। उद्योगले सिमेन्ट बेचेर वार्षिक ५ अर्ब रुपैयाँ आम्दानी गर्ने अनुमान गरिएको छ। कुल लगानीमध्ये ८० प्रतिशत बैंक ऋण र बाँकी संस्थापकहरूको स्वपुँजी (इक्विटी) स्वामित्व हुने गरी लगानी संरचना बनाइएको छ। सूर्यतारा कर्णाली प्रदेशको पहिलो सिमेन्ट उद्योग हो।

अहिलेसम्म कर्णाली र सुदूरपश्चिम क्षेत्रमा सिमेन्ट उद्योग छैन। दाङबाट सिमेन्ट लैजाँदा खरिदकर्ताले ढुवानी खर्च मात्रै बोराको ९० देखि एक सय २५ रुपैयाँसम्म बढी तिर्नुपरेको छ। सोही क्षेत्रमा सिमेन्ट उद्योग स्थापना गरेपछि उपभोक्ताले प्रतिबोरा १ सय रुपैयाँसम्म सस्तोमै सिमेन्ट किन्न पाउने उद्योगीको भनाइ छ ।

दाङ सतबरियामा रहेको सम्राट सिमेन्ट उद्योग स्थापना सूर्यताराका सञ्चालक मुकुन्द तिमल्सिनाले गरेका हुन्। विनोद चौधरीलाई बेचेर सम्राट सिमेन्टबाट बाहिरिएर सूर्यतारा सिमेन्ट सञ्चालनमा ल्याउन लागेका हुन्।

सूर्यतारा सिमेन्ट उद्योग प्रालिले सरकारबाट खानी पाएको छ। सूर्यताराले प्रतिस्पर्धाबाट सुर्खेतको बाह्रताल गाउँपालिकामा रहेको लमखली चुनढुंगा खानी उत्खन्नका लागि इजाजत (लाइसेन्स) पाएको हो।

सिमेन्ट उद्योगले एक करोड ११ लाख ११ हजार १११ रुपैयाँमा सो चुनढुंगा खानी पाएको खानी तथा भुगर्भ विभागले जनाएको छ।

हाल मुलुकभर ७५ सिमेन्ट उद्योग रहेका छन्। जसमध्ये ५५ ग्रान्डिङ र २० क्लिङकर उत्पादन गर्ने उद्योग रहेको नेपाल सिमेन्ट उत्पादक संघले जनाएको छ। यि मध्ये केही उद्योग बन्द भएका छन्।