झापाबाट आठौँपटक उम्मेदवार बनेका ओलीका यस्ता छन् ४२ बुँदे प्रतिबद्धता (पूर्णपाठ)

काठमाडौँ: झापा जिल्लाबाट आठौँपटक प्रतिनिधिसभा निर्वाचनका लागि उम्मेदवार बनेका पूर्वप्रधानमन्त्री तथा नेकपा एमालेका अध्यक्ष केपी शर्मा ओलीले आसन्न प्रतिनिधिसभा निर्वाचनका लागि प्रतिबद्धतापत्र सार्वजनिक गरेका छन्। आगामी निर्वाचनमा झापा–५ बाट उम्मेदवार बनेका उनले निर्वाचन क्षेत्रबाटै मंगलबार साँझ प्रतिबद्धता सार्वजनिक गरेका हुन्।

२०४८ को आम निर्वाचनबाट झापा–६ बाट उम्मेदवार बनेका उनी सदाबहादर प्रतिनिधिसभा उम्मेदवार हुन्। यसअघिका सात निर्वाचनमा उनी ६ पटक विजयी भएका छन्। २०६४ को संविधानसभा निर्वाचनमा भने उनी झापा–७ मा नेकपा (माओवादी)का विश्वदीप लिम्बूसँग पराजित भएका थिए।

गत भदौ २३ र २४ को जेनजी विद्रोहपछि सडकबाट सत्ताच्युत भएका ओलीलाई यसपटक राष्ट्रिय स्वतन्त्र पार्टी(रास्वपा)का वरिष्ठ नेता तथा काठमाडौँ महानगरका पूर्वमेयर बालेन्द्र साहको चुनौती छन्। देशभर रास्वपाको प्रभाव बढ्दै गएको अवस्थामा ओली यसपटक रक्षात्मक देखिएका छन्। झापा–५ मा चुनावी गतिविधिमा सक्रिय रहेका उनले आफ्नो चुनावी क्षेत्रका लागि प्रतिबद्धता सार्वजनिक गरेका हुन्। उनलाई नेकपा एमालेले भावी प्रधानमन्त्रीको उम्मेदवारका रूपमा अघि सारेको छ।

सार्वजनिक प्रतिबद्धताअनुसार ओलीले भ्रष्ट्राचार नियन्त्रणमा शून्य सहनशीलता, विगतका प्राप्त उपलब्धिलाई संरक्षण गर्ने, जनता आवास र विपन्न आवास निर्माणका कार्यक्रमलाई निरन्तरता दिने, आदिबासी, जनजाति, दलित, सन्थाल, मुस्लिमलगायतका पछाडि पारिएका सबै समुदायका नागरिकको जीवनस्तर उकास्ने किसिमका कार्यक्रम ल्याउनेलगायतका प्रतिबद्धता व्यक्त गरेका छन्।

स्वास्थ्य बीमा सेवालाई थप वृद्धि गर्दै व्यवस्थित गर्ने, स्तरोन्नति भइसकेका सबै ग्राभेल सडकहरूलाई क्रमश: कालोपत्रे गर्ने, अधुरो रहेका सबै सामुदायिक भवनहरूलाई क्रमिक रूपमा निर्माण कार्य सम्पन्न गर्ने, आवश्यक स्थानहरूमा अन्न, फलफूल भण्डारणका लागि शीतभण्डार निर्माण गर्ने, प्रत्येक पालिकामा एकएक सुविधा सम्पन्न खेलमैदान निर्माण र क्रमशः वडा स्तरसम्म खेलमैदानलाई विस्तार गर्ने, सबै सामुदायिक क्याम्पस र विद्यालयहरूलाई भौतिक र शैक्षिक रूपमा सक्षम बनाउनेलगायतका बाचा उनले गरेका छन्।