काठमाडौँ महानगरले बनाएको साइकल लेनमा त्रुटि नै त्रुटि, के भन्छन् साइक्लिस्ट ?

काठमाडौँ महानगरपालिकाले माइतीघर मण्डलादेखि तीनकुनेसम्म साइकल लेन र फुटपाथ विस्तारको काम लगभग सम्पन्न गरेको छ। यसअघि सडकमै हरियो रेखा कोरेर छुट्याइएको साइकल लेन जोखिमपूर्ण र अव्यवहारिक भएको भनेर विरोध भएपछि चौडा फुटपाथसँगै साइकल लेन बनाइएको हो।

तर साइक्लिस्टहरुले भने लेन प्रयोगमा जटिलता रहेको बताएका छन्। नेपाल साइक्लिङ संघका सचिव देवेन्द्र बस्न्यातले साइक्लिस्टहरुको दबाबपछि बल्ल लेन बनाउन लागिएको बताए। निर्माण भएपनि प्रयोगमा आउन नसकेको उनको भनाइ छ। उनले भने- साइक्लिङमा लागि यो लेन सजिलो छैन। साइकल लेनको इन्ट्री प्वाइन्टमै समस्या देखियो। कतिपय ठाउँमा कनेक्सन पनि छैन। कतिपय ठाउँमा दुर्घटनाको जोखिम छ। धेरै ठाउँ साँघुरो छ। धेरै कुरा सुधार गर्नु पर्नेछ।

अर्का साइक्लिस्ट लक्ष्मण बानियाले विकसित देशमा आफूले साइकल कुदाउँ कुदाउँ लाग्ने आकर्षक साइकल लेन देखेको अनुभव सुनाउँदै पैदल यात्रु हिड्ने र साइकल चलाउने लेन प्रष्ट रुपमा छुट्याउनु पर्ने बताए। उनले भने, ‘यहाँ साइकल लेन भनिए पनि खास लेन छैन। साइकल चलाउने हो कि मान्छे हिँड्ने हो फरक नै छैन। डिजाइनरले आफूलाई साइक्लिस्ट सोचेर डिजाइन गर्नुपर्थ्यो तर त्यस्तो भएको छैन। आफूलाई थाहा नभए जान्ने मान्छेसँग परामर्श लिनुपर्थ्यो।’

तीनकुने-माइतीघर सडक खण्डको साइकल लेनलाई लगभग १३ वर्षदेखि हेरिरहेका स्टोरी साइकलका सौरभ ढकाल भन्छन्- पहिले जस्तो थियो अहिले पनि त्यस्तै छ। खाली इँटा मात्रै परिवर्तन गरिएको छ। ग्रेडिङ, क्वालिटी र सहजतामा पटक्कै काम भएको देखिँदैन। यो ठाउँमा नयाँ फुटपाथ बनाउने काम सुरु भएपछि हामीले महानगरलाई निवेदन पनि दिएका थियौं। साइकल लेनको पुन डिजाइन गर्नुपर्छ भनेका थियौ। प्रयोगकर्ता मैत्री बनाउनुपर्छ भनेका थियौं। साइकल चढ्ने मान्छे बढाउनुपर्नेमा यो लेनले त अझ घट्ने देखिएको छ। साढे तीन किलोमिटर पार गर्न झण्डै २० पल्ट ओर्लेर फेरि चढ्नुपर्छ।  सरोकारवालासँग छलफल गरेर अझै पनि सुधार गर्ने मौका छ।