दाङ–२ मा फेरिएको चुनावी शैली: श्रमजीवीका पक्षमा प्रमोदको सादगीपूर्ण ‘प्रतिरोध’

आसन्न प्रतिनिधिसभा निर्वाचनको सरगर्मी बढ्दै जाँदा दाङ क्षेत्र नं. २ का स्वतन्त्र उम्मेदवार प्रमोद धितालले आफ्नो चुनावी अभियानलाई शालीन, सादगीपूर्ण र जनमुखी बनाएका छन्। ‘प्रतिरोध : जनअधिकार आन्दोलन’का तर्फबाट ‘रिक्सा’ चुनाव चिह्न लिएर चुनावी मैदानमा उत्रिएका धितालले ठूला राजनीतिक दलको तामझामभन्दा भिन्न शैलीमा मतदाताको घरदैलोमा पुगेर मत मागिरहेका छन्।

उम्मेदवार धितालले मंगलबार घोराहीका विभिन्न वडाहरूमा मतदातासँग प्रत्यक्ष संवाद गरे। उनले घोराही–१८ को नवलपुर र सालघारी; वडा नं. ११ को नारायणपुर, खैरा र मनुवा; वडा नं. ८ र १० को पत्थरकोट, सेवार, वनगाउँ र कटुकी तथा वडा नं. १२ को वसन्तपुर, बटोलपुर, कृष्णपुर र शाहीपुर लगायतका क्षेत्रमा घरदैलो सम्पन्न गरेका हुन् ।

उनी सानो टिम बनाएर मतदाताको घर तथा कार्यस्थलमै पुगेर आफ्ना कुरा राखिरहेका छन्। ध्यानसँग मतदाताका कुरा सुन्छन् अनि आफ्ना भावी योजना सुनाउँछन्। ‘हामीले सानो टिम बनाएर मतदाताका बीचमा पुगेर उहाँहरूका कुरा सुन्ने र आफ्ना एजेन्डाहरू राख्ने गरिरहेका छौँ,’ उम्मेदवार धितालले भने। मतदाताहरूले पनि ठूलो भीडभाडभन्दा आफूहरूकै जस्तो प्रचार–प्रसारको शैली मन पराएको उनको भनाइ थियो।

उम्मेदवार धितालले आफ्नो उम्मेदवारी श्रमजीवी वर्ग र सामाजिक–सांस्कृतिक न्याय र हक–अधिकारको पक्षमा भएको बताए। उनले अनावश्यक आश्वासन दिनेभन्दा पनि गर्न सक्ने कुरा मात्रै गरेर मतदातासँग मत मागिरहेको पनि बताए। ‘झुटा आश्वासनदेखि मतदाता वाक्कदिक्क हुनुहुन्छ, त्यसैले हामीले गर्न सक्ने कुरामात्रै मतदातालाई भनेका छौँ’, धितालले भने।

दाङ–२ मा नेकपा एमालेका महासचिव शंकर पोखरेल, नेपाली कांग्रेसका किरण किशोर घिमिरे, नेकपाका निर्मल आचार्य, राष्ट्रिय स्वतन्त्र पार्टीका विपिन कुमार आचार्यजस्ता हेवीवेट नेता प्रतिस्पर्धामा छन्। उम्मेदवार धितालले हेवीवेट नेताको पुरानो मानक जनताले भत्काइदिएको र अब पुरानो विरासतले मात्र चुनाव जित्ने अवस्था नरहेको बताए। ‘अहिले मतदाताले हाम्रा कुरा रुचीपूर्वक सुनेको र उहाँहरूले दिएको वचनका आधारमा हामी पनि यो क्षेत्रमा प्रतिस्पर्धी नै हौँ। पुरानो विरासत र संगठनको दादागिरीकै आधारमा चुनाव जित्ने अवस्था छैन’, धितालले भने।

उनले आफूले श्रमजीवी जनताको हकहितको कुरालाई मुख्य मुद्दा बनाएको बताए। ‘विकास, सुशासन, पारदर्शिता, जवाफदेहिता, जनपक्षीयता आम नेताका मुद्दा भइसके। हामीले यसका साथै श्रमजीवी जनताको हितलाई मुख्य मुद्दा बनाएका छौँ। श्रमिक अधिकार हाम्रो मुख्य मुद्दा हो’, उनले भने।

उम्मेदवार धितालले आफ्नो उम्मेदवारी अहिले स्वतन्त्रको रूपमा भए पनि आफू संगठनमा विश्वास गर्ने र अहिले पनि संगठनकै योजनामा स्वतन्त्र उम्मेदवारी दिएको बताए। ‘म त संगठनमा विश्वास गर्ने, समाज रूपान्तरण संगठित प्रयासबाट मात्रै सम्भव हुन्छ भन्नेमा विश्वास गर्छु। पार्टी नभए पनि अहिले मेरो उम्मेदवारी संगठित रूपमै हो’, उनले भने।

धिताल प्रतिरोध ः जनअधिकार आन्दोलनका केन्द्रीय संयोजक हुन्। उनले निर्वाचनमा प्रतिस्पर्धा हुने भए पनि आफ्नो प्रतिस्पर्धी कोही नभएको बताए। निर्वाचनलाई आफूहरूले आफ्ना कुरा जनतालाई सुनाउने र जनताका कुरा सुन्ने अवसरका रूपमा लिएको भन्दै निर्वाचनमा पराजित भए पनि जनताको सेवामा निरन्तर लाग्ने बताए। ‘हामीले निर्वाचनलाई प्रतिस्पर्धाका रूपमा मात्र नलिई आफ्ना कुरा जनतालाई सुनाउने र जनताका गुनासा आफूहरूले सुन्ने अवसरका रूपमा लिएका छौँ’, उनले भने, ‘हामी विजय भए पनि जनताको सेवामा हुन्छौँ भने पराजित भए पनि जनताकै सेवामा लाग्छौँ।’

उनले निर्वाचन जित्न जे पनि गर्ने प्रवृत्ति बढ्दै गएको बताए। अप्राकृतिक गठबन्धन, अनावश्यक भीडभाड, एजेन्डाभन्दा बढी व्यक्तित्वको प्रदर्शन, भाइरल हुने होड अहिलेको समस्या भएको बताए। आफूलाई सहयोग गर्ने र सहयोगका लागि आह्वान गर्नेको पनि कमी नभएको भन्दै उनले निर्वाचन जित्नका लागि जे पनि गर्ने सोचमा आफूहरू नभएको बताए।

उनले निर्वाचनमा आफ्नो कुरा जनतालाई भन्नका लागि ठूलो खर्च आवश्यक नभएको बताए। ‘हामीले सामान्य प्रचार–प्रसारका सामग्री तयार गरेका छौँ। होहल्लाभन्दा पनि कन्टेन्टमा जोड दिएका छौँ’, उनले भने, ‘सानो टिम बनाएर धेरैभन्दा धेरै जनतासामु पुग्ने प्रयास गरिरहेका छौँ।’