पहिलो पटक मतदान गरेका जेनजीहरू (फोटोफिचर)

काठमाडौँ: गत भदौ २३ र २४ गतेको जेनजी आन्दोलनपछि बनेको सुशीला कार्कीको अन्तरिम सरकारले आन्दोलनकारीको मागअनुसार संसद् विघटन गरेपछि बिहीबार देशभर मतदान जारी छ। दोलखा र सर्लाहीसहित एकाध ठाउँमा तनावपूर्ण घटना भए पनि देशभर अन्य ठाउँमा उत्साहपूर्वक मतदान भैरहेको छ।

राजधानी काठमाडौँसहित देशभरका १० हजार ९६७ मतदान स्थल र २३ हजार ११२ मतदान केन्द्रहरूमा बिहान ७ बजेदेखि मतदान जारी छ। बिहानैदेखि मतदाताहरू विशेष गरी युवा र जेष्ठ नागरिकहरू, नजिकैको मतदान केन्द्रमा लामबद्ध भएका छन्। यसपटक जेनजी उमेर समूहका मतदाता पनि उत्साहपूर्ण तरिकाले मतदानमा सहभागी छन्। धेरै जेनजीले यसपालि पहिलोपटक मतदान गरिरहेका छन्।

करिब १ करोड ८९ लाख ३ हजार ६८९ जना कुल मतदाता रहेकोमा करिब ८ लाख नयाँ युवा मतदाता रहेका छन्। कुल १६५ सिटका लागि प्रत्यक्षतर्फ र ११० सिटका लागि समानुपातिकतर्फ गरी जम्मा २७५ सदस्यका लागि मतदान भइरहेको छ।

निर्वाचन आयोगले साँझ ५ बजेसम्म मतदान गर्न सकिने व्यवस्था मिलाएको छ।

तस्बिरमा हेर्नुहोस् पहिलोपटक मतदान गरेका जेनजीहरू, जुन तस्बिहरू झापा–५ का विभिन्न मतदानस्थलबाट लिइएको हो।