दुई अर्बमा टोखामा सहेन्शा अपार्टमेन्ट बनाउँदै व्यवसायी दीपक मल्होत्रा

काठमाडौँ: व्यावसायिक घराना आईएमएस ग्रुपले राजधानीको टोखामा होटलसहितको आवासीय अपार्टमेन्ट परियोजना निर्माण थालेको छ। ग्रुपका अध्यक्ष दीपक मल्होत्राले टोखा नगरपालिका-७ मा रहेको होटल साहेनशाह इन्टरनेसनलमा होटलसहितको साहेनशाह अपार्टमेन्ट बनाउन लागेका हुन्।

चार रोपनी १५ आना क्षेत्रफलमा फैलिने प्रस्तावित भवन ५१.३६ मिटर अग्लो १५ तलाको हुनेछ। त्यसमा ८३ वटा अपार्टमेन्ट एकाइ हुने भएको छ। अपार्टमेन्ट परियोजना अघि बढाउन होटलले वातावरणीय प्रभाव मूल्याङ्कन (ईआईए) को काम अघि बढाएको छ। परामर्शदातामा कञ्चन इन्जिनियरिङ कन्सल्टेन्सीले काम गरिरहेको छ।

अपार्टमेन्ट परियोजनाको लागत दुई अर्ब दुई करोड रुपैयाँ अनुमान गरिएको छ। जसमा ६० प्रतिशत बैङ्कको ऋण र बाँकी ४० प्रतिशत संस्थापकको स्वपुँजी (इक्विटी) हुने गरी लगानी संरचना बनाइएको छ।

जसमा एक अर्ब २० करोड रुपैयाँ लगानी व्यवस्थापन भइसकेको छ। यद्यपि, सुरुआतमा ढिलाइ र व्यापार रणनीतिमा परिवर्तनले कार्यान्वयन जोखिम बढाएको छ। विशेष गरी समयरेखा, लागत नियन्त्रण र अपार्टमेन्ट बिक्रीबाट समयमै हुनुपर्ने हुन्छ।

कम्पनीले हाल आवासीय अपार्टमेन्टहरू र बैङ्क्वेट सुविधाहरू समावेश गर्ने मिश्रित प्रयोग रियल स्टेट परियोजनाको विकास गरिरहेको छ। परियोजनामा २५ कोठाको होटल पनि समावेश थियो, जुन कम्पनीले प्रत्यक्ष रूपमा सञ्चालन गर्ने योजना बनाएको थियो।

यद्यपि, कम्पनीले होटल पूर्वाधार तेस्रो पक्षलाई भाडामा दिएर आफ्नो लगानी रणनीतिमा परिवर्तन गरेको छ।

होटल र अपार्टमेन्ट परियोजना बनाउन तीन अर्ब ३७ करोड ३० लाख रुपैयाँ लगानी हुने रेटिङका लागि सार्वजनिक गरिएको विवरणमा उल्लेख छ।

होटल साहेनशाह इन्टरनेसनल सन् १९९६ मा स्थापना भएको हो।

आईएमएसले सूचना प्रविधिका साथै नेपालमा सामसङ मोबाइल बिक्रीवितरण गर्दै आएको छ। सामसङलाई नेपालमा ब्रान्डका रूपमा स्थापित गरेका व्यवसायी मल्होत्रा गाडी, रियल स्टेट, मोबाइल र जलविद्युत्सहित दर्जनौँ व्यवसायमा आबद्ध छन्।

त्रिभुवन अन्तर्राष्ट्रिय विमानस्थलको पार्किङ व्यवस्थापनदेखि मोबाइल वालेट सेलपेसम्मको बिजनेस मल्होत्राले गर्दै आएका छन्। उनको अनलाइन सपिङ मार्केट स्मार्ट डोको पनि सञ्चालनमा छ।

राजधानीको कालिकास्थानमा सिल्भर सिटी अपार्टमेन्ट निर्माण गरी सञ्चालन गरिरहेका दीपकले अहिले घरजग्गा व्यवसायलाई नेपालको पहिलो पब्लिक कम्पनी बनाएका छन्।

मल्होत्राले पहिलो पब्लिक कम्पनी नेपाल रियल इस्टेट म्यानेजमेन्ट लिमिटेड दर्ता पनि गरेका छन्। कम्पनीको पुँजी ५ अर्ब रुपैयाँ छ।