प्रधानन्यायाधीश कार्कीले लिए शपथ

काठमाडौँ- राष्ट्रपति रामचन्द्र पौडेलले प्रधानन्यायाधीश हरिकृष्ण कार्कीलाई पद तथा गोपनीयताको शपथ दिलाएका छन्। शुक्रबार साँझ प्रधानन्यायाधीश कार्कीलाई शपथ दिलाएका हुन्।

संसदीय सुनुवाइ समितिले प्रधानन्यायाधीशमा कार्कीलाई अनुमोदन गरेपछि राष्ट्रपतिले शपथ दिलाएका हुन्। शुक्रबार मात्रै समितिले कार्कीलाई अनुमोदन गर्ने निर्णय गरेको थियो।

यसअघि संसदीय समितिमा बिहीबार र शुक्रबार कार्कीसँग सांसदहरूको सवालजवाफ भएको थियो। सांसदहरूले सोधेका प्रश्नहरूमा कार्कीले अदालतले गरेको फैसलाका विषयमा टिप्पणी नगर्ने नभने पनि अध्येताहरूले व्याख्याविश्लेषण गर्न सक्ने उल्लेख गरिदिएका थिए। सांसदहरूले कुनै व्यक्तिलाई प्रधानमन्त्री नियुक्त गर्न परमादेश गर्नु कति उपयुक्त हुने भन्ने विषयमा गरेको सवालमा कार्कीको यस्तो जवाफ थियो।

कार्कीले स्वच्छ, निष्पक्ष, छिटो छरितो एवं गुणस्तरीय न्याय सम्पादन गरी सबैका लागि न्याय सुनिश्चित गर्नु आफ्नो मुख्य जिम्मेवारी भएको बताएका छन्। संसदीय सुनुवाइ समितिमा कार्कीले न्याय प्रशासनलाई प्रभावकारी बनाउने जिम्मेवारीप्रति त्यतिकै सजग र संवेदनशील रहने पनि स्पष्ट पारेका थिए।

‘सबैका लागि न्याय सुनिश्चित गर्ने मुख्य जिम्मेवारीप्रति त्यतिकै प्रतिबद्ध रहनेछु। प्रस्तुत कार्ययोजनाबाट न्यायिक सुशासन र  न्यायपालिकाप्रतिको आस्था एवं विश्वास अभिवृद्धिमा महत्वपूर्ण योगदान पुग्ने ठानेको छु,’ उनले भनेका थिए।

विसं २०१५ भदौ २५ गते ओखलढुङ्गाको माम्खामा जन्मनुभएका प्रधानन्यायाधीश कार्कीले विसं २०३९ मा त्रिभुवन विश्वविद्यालयबाट कानुनमा सङ्कायमा स्नातक गरेका छन्। लामो समयसम्म वकालत पेसा अंगालेका उनले विसं २०६९ मा वरिष्ठ अधिवक्ताको उपाधि प्राप्त गरे।

सोही वर्ष कार्की नेपाल बार एसोसिएसनको अध्यक्षमा निर्वाचित भएका थिए। विसं २०७१ मा नेपाल सरकारको महान्यायाधिवक्ता पदमा नियुक्त भएका कार्की नेपाल बार काउन्सिल र नोटरी पब्लिक काउन्सिलको अध्यक्ष भए।

विसं २०७२ मा सर्वाेच्च अदालतको न्यायाधीशको जिम्मेवारीमा प्रवेश गरेका कार्कीलाई न्याय सेवा परिषद् र न्यायसेवा आयोगको सदस्य भई काम गरेको अनुभव छ।

संवैधानिक परिषद्ले उनलाई गत वैशाख २५ गते नेपालको प्रधानन्यायाधीश पदमा नियुक्तिका लागि सिफारिस गर्दै संसदीय सुनुवाइ गर्न सङ्घीय संसद्समक्ष पठाउने निर्णय गरेको थियो।

सर्वोच्च अदालतमा झन्डै ८ महिनादेखि प्रधानन्यायाधीशको पद रिक्त थियो। त्यसैबेलादेखि कायममुकायम प्रधानन्यायाधीश रहेका कार्की शुक्रबार न्यायपालिकाको सर्वोच्च पदका लागि शपथ लिएका हुन्।‍