आईसीटी फाउन्डेसनद्वारा ५० भन्दा बढी स्टार्टअपलाई इन्क्युबेसन, मेन्टरशिपदेखि लगानीसम्म सहयोग

काठमाडौँ: आईसीटी फाउन्डेसनले ५० भन्दा बढी स्टार्टअपलाई इन्क्युबेसन, मेन्टरशिपदेखि लगानीसम्मको समग्र सहयोग प्रदान गरेको जनाएको छ। फाउन्डेसनका अनुसार नवप्रवर्तन र उद्यमशीलता प्रवर्द्धन गर्ने उद्देश्यले सञ्चालन गरिएका विभिन्न कार्यक्रममार्फत प्रारम्भिक चरणका स्टार्टअपहरूलाई आवश्यक पूर्वाधार, सीप र वित्तीय पहुँच उपलब्ध गराइएको छ।

इन्क्युबेसन कार्यक्रमअन्तर्गत स्टार्टअपहरूलाई कार्यस्थल, प्राविधिक सहयोग, व्यवसाय विकास तालिम तथा नेटवर्किङका अवसर प्रदान गरिएको छ। त्यस्तै, मेन्टरशिपमार्फत अनुभवी उद्यमी तथा विषयगत विज्ञहरूसँग प्रत्यक्ष सहकार्य गर्ने वातावरण सिर्जना गरिएको फाउन्डेसनले जनाएको छ।

लगानी पहुँच विस्तारका लागि ‘पिचिङ’ सेसन, लगानीकर्ता–उद्यमी अन्तरक्रिया तथा साझेदारी निर्माणका कार्यक्रमहरू सञ्चालन गरिएको छ। यसबाट धेरै स्टार्टअपहरूले प्रारम्भिक चरणमै लगानी जुटाउन सफल भएको फाउन्डेसनको दाबी छ।

सूचना प्रविधि, कृषि प्रविधि, स्वास्थ्य, शिक्षा तथा डिजिटल सेवाजस्ता विविध क्षेत्रमा काम गर्ने स्टार्टअपहरूलाई प्राथमिकतामा राखेर सहयोग विस्तार गरिएको जनाइएको छ। फाउन्डेसनका पदाधिकारीहरूले नेपालमा स्टार्टअप इकोसिस्टम क्रमशः विस्तार हुँदै गएको उल्लेख गर्दै सरकार, निजी क्षेत्र र लगानीकर्ताबीचको सहकार्य अझ मजबुत बनाउनुपर्नेमा जोड दिएका छन्।

आगामी दिनमा अझ धेरै नवप्रवर्तनशील स्टार्टअपहरूलाई समेट्दै रोजगारी सिर्जना र आर्थिक वृद्धिमा योगदान पु¥याउने लक्ष्य फाउन्डेसनले लिएको जनाएको छ।