सेयर बजारमा कृत्रिम कारोबार: दीपक भट्ट मुख्य दोषी, शेखर गोल्छा र रोहित गुप्तालगायत सहयोगी

काठमाडौँ: नेपाल धितोपत्र बोर्ड (सेबोन)ले सेयर बजारमा कृत्रिम कारोबार गरी मूल्यमा अस्वाभाविक चलखेल गरेको आरोपमा विवादित व्यवसायी दीपक भट्टलाई मुख्य दोषी ठहर गरेको छ।

सम्पत्ति शुद्धीकरण विभागको पत्रका आधारमा बोर्डले दीपक भट्टले गरेको धितोपत्र कारोबार सम्बन्धी प्रारम्भिक जाँचबुझ गर्न बनेको समितिले धितोपत्र दलाल व्यवसायी भृकुटी स्टक ब्रोकिङ्ग कम्पनी प्रालिले भट्टबाट उनले धितोपत्र खरिद गरेको कुनै पनि रकम नलिने गरेको निष्कर्ष निकालेको छ। भट्टसँग सम्बन्धित विभिन्न कम्पनी र ती कम्पनीका सञ्चालकहरूलाई दिनुपर्ने रकम नदिइ त्यस रकमबाट नै धितोपत्रको राफसाफ तथा फछ्र्यौट गर्ने गरेको प्रतिवेदनमा भनिएको छ।

भट्टले कुनै पनि रकम भुक्तानी नगर्ने कार्यबाट रकमको लेनदेनबिना नै उधारोमा सेयर कारोबार गरी सेयरको मूल्य वृद्धि भएको हुन सक्ने र यसबाट धितोपत्र सम्बन्धी ऐन, २०६३ को दफा ९६ बमोजिमको कसूर भएको हुनसक्ने देखिएको ठहर सेबोनले गरेको छ।

अनुसन्धानका क्रममा भट्टले आफ्नो ४.५ प्रतिशत सेयर स्वामित्व भएको इन्फिनिटी होल्डिङ्गबाट सन् २०२५ नोभेम्बर ९ मा एक हजार ८० कित्ता सेयर खरिद गरी नोभेम्बर १६ मा १५ प्रतिशत सेयर स्वामित्व रहेको गार्डियन माइक्रो लाइफ इन्स्योरेन्स कम्पनीलाई प्रति कित्ता रू. एक १६० देखि एक हजार १८२ सम्ममा तथा हिमालयन रिइन्स्योरेन्सअन्तर्गत स्वामित्वमा रहेको प्रोटेक्टिभ माइक्रो इन्स्योरेन्स कम्पनी प्रतिकित्ता एक हजार १८५ रुपैयाँमा बिक्री गरेको भेटिएको हो।

प्रतिवेदनले मुख्य दोषी भट्टलाई देखाएकोमा अन्य आरोपितकारूपमा भृकुटी स्टक ब्रोकिङ कम्पनिका कार्यकारी प्रमुख संदीप चाचान, शुभी अग्रवाल, ऋषि राज मोर र राजबहादुर शाहको नाम उल्लेख गरेको छ। भट्टबाहेक शुभी अग्रवाल, राजबहादुर शाह र ऋक्षिराज मोरले भृकुटी स्टक ब्रोकिङ्ग कम्पनी प्रालिलेबाट कुनै रकम नतिरी उधारोमा सेयर लिएको देखिएको निष्कर्ष प्रतिवेदनले निकालेको छ।

यस्तै उक्त कसुर गर्न सहयोग गर्नेमा नेपाल उद्योग वाणिज्य महासंघका पूर्वअध्यक्ष शेखर गोल्छासमेत रहेको निष्कर्ष सेबोनको छ। उक्त कसुरमा गोल्छासहित रोहित गुप्ता तथा कम्पनीहरू  हिमालयन रिइन्स्योरेन्स, हिमालयन क्यापसर्व, हिमालय सेक्युरिटिज बैंकर,  एचएलआई लार्ज क्याप फण्ड र नेपाल माइक्रो इन्स्योरेन्स कम्पनीले कसुरमा सहयोग गरेको बताएको छ।

महासंघका पूर्वअध्यक्ष गोल्छाले रकम भुक्तानी नै नगरी साढे ५२ करोड रुपैयाँको सेयर खरिद तथा राफसाप गरी कसुर गर्न सहयोग गरेको निष्कर्ष सेबोनको छ। गोल्छाबाट सो बराबरको रकम भृकुटी स्टक ब्रोकिङ्गले रकम लिन बाँकी रहेको प्रतिवेदनमा उल्लेख गरिएको छ। भृकुटी स्टक ब्रोकरको रकम लिई उक्त ब्रोकरको धितोपत्र राफसाप गर्न गोल्छाले २०२५ जुलाई २० मा १० करोड, जुलाई २१ मा थप १० करोड, जुलाई २३ मा २० करोड, जुलाई २५ मा १० करोड र अगस्ट ८ मा २ करोड ५० लाख जम्मा गरेको देखिएको छ।

हिमालयन रिइन्स्योरेन्समा गोल्छा २०८२ फागुन २५ गतेसम्म अध्यक्ष र २०८० फागुन  २० देखि हालसम्म रोहित गुप्ता सञ्चालक रहेका थिए।