रोलक्रममा चौथो स्थानमा रहेका शर्मा प्रधानन्यायाधीश सिफारिस

काठमाडौँ: संवैधानिक परिषद्ले न्यायाधीश मनोजकुमार शर्मालाई प्रधानन्यायाधीश सिफारिस गरेको छ। बिहीबार बेलुका बसेको परिषद्ले शर्मालाई प्रधानन्यायाधीशका लागि सिफारिस गर्ने निर्णय गरेको हो।

चैत १८ मा प्रकाशमानसिंह राउत अनिवार्य अवकाशमा गएपछि त्यसयता वरिष्ठतम न्यायाधीश मल्लले  कायमुकायमका रूपमा सर्वोच्चको नेतृत्व सम्हालिरहेकी छन्।

प्रधानन्यायाधीश अवकाशमा जानुभन्दा एक महिना पहिले नै नयाँ प्रधानन्यायाधीशको नाम सिफारिस गर्ने व्यवस्थाअनुसार सर्वोच्च अदालतको प्रधान्यायाधीशका लागि ६ जना न्यायाधीशको नाम सिफारिस गरेको थियो।

न्याय परिषद्को बैठकले सर्वोच्च अदालतका वरिष्ठतम् न्यायाधीश सपना प्रधान मल्ल, न्यायाधीश डा. मनोजकुमार शर्मा, कुमार रेग्मी, हरि फुँयाल, तिलप्रसाद श्रेष्ठ र डा. नहकुल सुवेदीको नाम सिफारिस गरेको थियो।

वरिष्ठतमका आधारमा मल्लपछि न्यायाधीशहरू कुमार रेग्मी, हरिप्रसाद फुयाल, मनोजकुमार शर्मा, नहकुल सुवेदी र तिलप्रसाद श्रेष्ठ रहेका थिए। यसअघिको परम्परा वरिष्ठतम् न्यायाधीश प्रधानन्यायाधीश बन्ने रहेकोमा उक्त परम्परा तोड्दै चौथो वरीयताक्रममा रहेका शर्माको नाम प्रधानन्यायाधीशका लागि सिफारिस भएको हो।

प्रधानन्यायाधीश नियुक्ति ज्येष्ठताको परम्परामा आधारित हुने गरेकोमा यसपटक त्यो परम्परा ढलेसँगै रोलक्रमअनुसार प्रधानन्यायाधीशको लाइनमा रहेकी वरिष्ठतम न्यायाधीश मल्ल सर्वोच्चको नेतृत्व सम्हाल्नबाट वञ्चित भएकी छन्।