पाँचतारे बन्न क्षमता बढाउँदै सब्रिना होटल, ‘ट्राइब’ ब्राण्डमा चल्ने

काठमाडौँ: सब्रिना होटेल लिमिटेडको क्षमता विस्तार भइरहेको छ। पाँचतारे होटलमा अपग्रेड हुन क्षमता विस्तारको काम सुरु भएको हो। निर्माण सकिएपछि होटलको क्षमता १०३ कोठा हुने भएको छ।

पर्यटकीय स्तरको होटल (टुरिस्ट स्ट्यान्डर्ड होटल) ४८ कोठाहरु सञ्चालनमा रहेका छन्। होटल सन् २०१८ मा सुरु भएर २०२० देखि सञ्चालनमा आएको हो।सुविधा सम्पन्न होटेलको रूपमा सञ्चालनमा आउनेछ। होटल तीन रोपनी जग्गामा रहेको छ। होटल बनाउन सब्रिनाले एक अर्ब २५ करोड रुपैयाँ ऋणको रेटिङसमेत गराएको छ।

स्तरोन्नतिपछि होटेलमा तीन वटा रेस्टुरेन्ट रहने भएको छ। रुफटपमा रहने रेस्टुरेन्ट शहरकै सबैभन्दा ठूलो रुफटप रेस्टुरेन्ट मध्येको एक हुने सब्रिना होटलले जनाएको छ। कोठाको औसत आकार नै ३० वर्ग मिटर हुने गरी स्तरोन्नति भइरहेको छ। स्वीमिङ पुल, हेल्थ क्लब, स्पा, जिम र क्यासिनोलगायतका आधुनिक सबै सुविधा रहने होटलले जनाएको छ।

प्रिमियम होटल परियोजनाहरूलाई सामान्यतया निर्माणको लागि तीन देखि चार वर्ष लाग्छ। त्यसपछि सञ्चालन स्थिरीकरणका लागि थप दुईदेखि तीन वर्ष लाग्छ।

पाहुनाहरूलाई आकर्षित गर्न, अकुपेन्सी स्तर कायम राख्न, औसत कोठा दरहरू बढाउन र अनुमानित सञ्चालन कार्यसम्पादन प्राप्त गर्न प्रतिष्ठित विश्वव्यापी आतिथ्य ब्रान्डसँगको यसको सम्बन्धलाई लाभान्वित गर्नु क्रेडिट दृष्टिकोणबाट महत्वपूर्ण हुनेछ।

होटल ‘ट्राइब’ ब्राण्डमा चल्ने
साब्रिना होटेल लिमिटेडले काठमाडौँको बुढानीलकण्ठस्थित गणेश चोकमा रहेको छ। होटेल अब ट्राइब ब्रान्डमा चल्ने भएको छ। ट्राइब विश्वप्रसिद्ध फ्रान्सेली होटल ग्रुपको एकोरको ब्राण्ड हो।

साब्रिना होटेल र ट्राइब होटेलबीच दुई साताअघि भारतको राजधानी नयाँ दिल्लीमा व्यवस्थापन सञ्चालन सम्झौता भएको हो। ट्राइब ब्रान्डको दक्षिण एसिया मै पहिलो होटल प्रोपर्टी हुने भएको छ। नेपालमा एकोरकै मरक्यूर ब्राण्ड राजधानीको सुकेधारमा पाँचतारे होटल सञ्चालनमा छ।

सब्रिना होटेलका अध्यक्ष निराजन थापा रहेका छन्। उनले एकोरसँग साझेदारी गरी नेपालमा ट्राइब ब्रान्ड ल्याउन पाउँदा अत्यन्त खुसी भएको बताएका छन्।

ट्राइब ब्राण्ड यसको आधुनिक डिजाइन, व्यवहारिक सुविधा, सामाजिक स्पेस र सुलभ मूल्यमा गुणस्तरीय अनुभवका लागि विश्वभर चर्चित छ। विश्वभर ट्राइब ब्रान्डका २७ होटेल सञ्चालनमा छन्। ट्राइबको उपस्थिति थाइल्याण्ड, इन्डोनेसिया, कम्बोडिया लगायतका एसियाली देशमा रहेको छ।

४७ करोडको आईपीओ जारी गर्ने
सब्रिना होटेलले निकट भविष्यमा सर्वसाधारणलाई सेयर (आईपीओ) निष्काशन गर्ने भएको छ। आईपीओ ल्याउन होटलले नेपाल धितोपत्र बोर्डमा आवेदन दिइसकेको जनाएको छ।

आईपीओ जारी गर्न दुई वर्षअघि सब्रिना होटल पब्लिक लिमिटेडमा परिणत भएको हो। हाल होटलको जारी पुँजी एक अर्ब १२ करोडबाट बढाएर १ अर्ब २२ करोड रुपैयाँ कायम गरिएको छ।

जसमध्ये ७४ करोड ९६ लाख संस्थापक समूहको स्वामित्व रहने गरी लगानी संरचना बनाइएको छ। होटलले ४७ करोड रुपैयाँ बराबरको ४७ लाख कित्ता आईपीओ निष्कासन गर्ने तय भएको छ। आईपीओ निष्कासन तथा बिक्री प्रवन्धकमा एनआईसी एसिया क्यापिटल लिमिटेड रहेको छ।

होटल निरन्तर नोक्सानमा
सब्रिना होटल सञ्चालनमा आएको चार आर्थिक वर्षदेखि निरन्तर नोक्सानमा सञ्चालन भइरहेको छ। होटलले गत वर्ष सात करोड रुपैयाँको व्यवसाय गरेको थियो।

यस्तै २०२४ मा छ करोड ५० लाख र २०२३ मा आठ करोड रुपैयाँको व्यापार गरेको सार्वजनिक गरेको वित्तीय विवरणमा उल्लेख छ।