व्हाट्सएपमा फोन नम्बर बिना कुराकानी गर्ने ‘युजरनेम’ सुविधा आउँदै

काठमाडौँ: मेटाको स्वामित्वमा रहेको व्हाट्सएपले प्रयोगकर्ताले आफ्नो फोन नम्बर सार्वजनिक नगरी सम्पर्क गर्न सक्ने नयाँ ‘युजरनेम’ सुविधा ल्याउने तयारी गरेको छ। कम्पनीले यसका लागि युजरनेमको अग्रिम रिजर्भेसन प्रक्रिया पनि सुरु गरेको जनाएको छ।

कम्पनीका अनुसार यो सुविधा आगामी केही महिनाभित्र चरणबद्ध रूपमा विश्वभरका प्रयोगकर्तामाझ उपलब्ध गराइनेछ। हाल प्रयोगकर्ताले आफूलाई मनपर्ने युजरनेम पहिले नै सुरक्षित गर्न सक्नेछन्, जुन सुविधा पूर्ण रूपमा लागू भएपछि स्वतः प्रयोगमा आउनेछ।

व्हाट्सएपले आफ्नो आधिकारिक ब्लगमार्फत यो अपडेट प्रयोगकर्ताको गोपनीयता (प्राइभेसी) थप मजबुत बनाउने उद्देश्यले ल्याइएको जनाएको छ। विशेषगरी अपरिचित व्यक्तिसँगको संवाद, ठूला समूह च्याट तथा व्यवसायसँगको सम्पर्कका क्रममा अब प्रयोगकर्ताको फोन नम्बर देखिने छैन।

कम्पनीले ब्लगमा उल्लेख गरेको छ, “नयाँ व्यक्तिसँग भेट हुँदा आफ्नो फोन नम्बर साझा गर्नु धेरैका लागि सहज नहुन सक्छ। त्यसैले अब केवल कुराकानी गर्न फोन नम्बर अनिवार्य हुने छैन।”

सुरक्षालाई थप मजबुत बनाउन कम्पनीले ‘युजरनेम की’ नामक अतिरिक्त सुरक्षा प्रणाली पनि ल्याउने भएको छ। यसअन्तर्गत कसैलाई सम्पर्क गर्न युजरनेम मात्र पर्याप्त नहुने, थप सुरक्षा कोड पनि आवश्यक पर्नेछ।

त्यस्तै, युजरनेम प्रणालीमा सार्वजनिक डाइरेक्टरी वा सर्च सुझाव उपलब्ध नहुने भएकाले अनावश्यक सन्देश आउने जोखिम पनि कम हुने कम्पनीको दाबी छ।

कम्पनीका अनुसार प्रयोगकर्ताले अधिकतम ३५ अक्षरसम्मको युजरनेम राख्न सक्नेछन्। युजरनेममा अक्षर, अंक, डट (.) र अन्डरस्कोर (_) प्रयोग गर्न सकिनेछ। साथै, प्रयोगकर्ताले आवश्यक परे जुनसुकै बेला आफ्नो युजरनेम परिवर्तन वा हटाउन पनि सक्नेछन्।

व्यवसाय तथा कन्टेन्ट क्रिएटरहरूले भने मेटाअन्तर्गतका अन्य प्लेटफर्म, जस्तै इन्स्टाग्राम र फेसबुकमा प्रयोग भइरहेको एउटै युजरनेम व्हाट्सएपमा पनि सुरक्षित गर्न सक्ने सुविधा पाउनेछन्।

कम्पनीका अनुसार यो सुविधा चरणबद्ध रूपमा विस्तार गरिनेछ। प्रयोगकर्ताको खातामा उपलब्ध भएपछि इन–एप सूचनामार्फत जानकारी दिइनेछ।एएनआई