ग्यास सिलिन्डरका लागि दुई दिन लाइन बस्छन् उपभोक्ता, उद्योगमन्त्री भन्छिन्– बजारमा अभाव छैन

काठमाडौँ: पछिल्लो केही दिनयता बजारमा खाना पकाउने एलपी ग्यासको अभाव भएको भन्दै उपभोक्ताको गुनासो चुलिएको छ। तर सरकारले भने बजारमा ग्यासको अभाव नरहेको दाबी गरेको छ। उद्योग, वाणिज्य तथा आपूर्तिमन्त्री गौरीकुमारी यादवले ग्यासको आपूर्ति र मौज्दात पर्याप्त रहेको भन्दै हल्लाको पछि नलाग्न उपभोक्तालाई आग्रह गरेकी छिन्।

मन्त्री यादवले ग्यास अभाव रहेको भन्नेमा सत्यता नरहेको दाबी गरेकी हुन्। उनले पर्याप्त मौज्दात रहेको भन्दै हल्लाको पछि लागेर नआत्तिन आग्रह गरेकी छन्।

उनले बजारमा कृत्रिम अभावको हल्ला चलेको भन्दै आपूर्ति र ग्यास मौज्दातबारे मन्त्रालयले सूक्ष्म निगरानी गरिरहेको बताइन्। अभावको हल्लाले आवश्यकताभन्दा बढी ग्यास सिलिन्डर सञ्चय गर्दा त्यसको चाप परेको निष्कर्ष मन्त्रालयको छ

मन्त्रालयले अभाव नरहेको दावी गरे पनि उपभोक्ताले भने सिलिन्डर नपाएर सास्ती बेहोरिरहेक छन्। सुर्खेतमा एक सातादेखि खाना पकाउने एलपी ग्यास लिन आउनेहरूको भीड लाग्ने गरेको छ। स्थानीय राति २ः०० बजेदेखि खाली ग्यास सिलिन्डर लिएर ग्यास डिलरमा पुग्छन्। एक–दुई दिन कुरेर मात्र भरिएको सिलिन्डर लिएर फर्किन्छन्। पछिल्लो समय ग्यास अभाव देखिएपछि उपभोक्ताले सास्ती खेप्नुपरेको हो।