बाढी र पहिरोले इवाखोला आयोजना बन्द, १० मेगावाट बिजुली आपूर्ति प्रणाली बाहिर

काठमाडौं। रिडी पावर कम्पनी लिमिटेडले सञ्चालन गरिरहेको ९.९ मेगावाट क्षमताको इवाखोला जलविद्युत आयोजना बन्द भएको छ।

अविरल वर्षाका कारण आएको बाढी तथा पहिरोबाट आयोजनाको हेडरेस पाइपलाइन रहेको क्षेत्रमा नदी कटान भई पाइपलाइनका आधार संरचनाहरू तथा अन्य सिभिल संरचनामा क्षति पुगेपछि आयोजना बन्द भएको कम्पनीले जनाएको छ।

निरन्तरको वर्षा र पाइपलाइन मुनिको भागहरु भुःक्षय हुन गई अत्यधिक दबाब सिर्जना भई विभिन्न स्थानमा पाइप फुट्ने तथा चिरा पर्ने समस्या देखिएको छ।

कम्पनीले आवश्यक मर्मत गरी आयोजना पुनः सञ्चालनमा ल्याउने प्रयासस्वरूप विभिन्न चरणमा मर्मत तथा परीक्षण कार्य गरेको थियो। तर, परीक्षणका क्रममा पुनः विभिन्न स्थानमा पाइपलाइनमा क्षति देखिएकाले विस्तृत प्राविधिक मूल्यांकनपछि सामान्य मर्मत वा वेल्डिङबाट मात्र आयोजना सुरक्षित रूपमा सञ्चालन गर्न सम्भव नरहेको निष्कर्षमा पुगिएको कम्पनीले जनाएको छ।

आयोजना गत असार २६ गतेबाट लागि उत्पादन बन्द भएको छ। हाल स्थायी समाधानका लागि आवश्यक प्राविधिक अवलोकन तथा मर्मत कार्य अगाडि बढाइएको कम्पनीले जनाएको छ। आयोजना पुनः सञ्चालनमा आउने मिति तथा समय यकिन भएपछि अर्को औपचारिक सूचनामार्फत जानकारी गराउने कम्पनीले जनाएको छ।