शाकाहारी आहारले शरीरको तौल घटाउँछ?

एजेन्सी। कम बोसोयुक्त शाकाहारी (भेगन)आहारले निरन्तर भोकसँग जुध्नुपर्ने आवश्यकता बिना नै तौल घटाउन सहयोग गर्न सक्ने एक अध्ययनले देखाएको छ।

१६ हप्तासम्म गरिएको एक क्लिनिकल परीक्षणमा फलफूल, तरकारी, अन्न तथा गेडागुडीमा केन्द्रित आहार अपनाएका सहभागीहरूले कुल खानाको मात्रा लगभग उस्तै खाए पनि प्रतिदिन करिब ३५७ क्यालोरी कम उपभोग गरेका थिए।

नयाँ अनुसन्धानअनुसार कम बोसोयुक्त भेगन आहारले मानिसले खाने खानाको ऊर्जा घनत्व करिब ३० प्रतिशत घटाउन सक्छ। यसले पेटभरि र सन्तोषजनक मात्रामा खाना खाँदा पनि कम क्यालोरी लिन मद्दत गर्छ।

जेएएमए नेटवर्क अपनमा प्रकाशित अनुसन्धानअनुसार क्यालोरी सीमित गर्न नदिइए तौल घट्ने देखिएको छ। अधिक तौल भएका वयस्कहरूलाई सहभागी गराएर गरिएको अनियमित क्लिनिकल परीक्षणमा इच्छाअनुसार खान मिल्ने कम बोसोयुक्त भेगन आहार अपनाउने सहभागीहरूले प्रति ग्राम खानाबाट प्राप्त गर्ने क्यालोरीमा उल्लेख्य कमी ल्याएका थिए।

अनुसन्धानकर्ताहरूले ऊर्जा घनत्वमा जति धेरै कमी आयो, क्यालोरी सेवन र तौल घट्ने दर पनि त्यति नै बढी भएको पाइएको थियो।

फिजिसियन्स कमिटी फर रेस्पोन्सिबल मेडिसिनकी क्लिनिकल रिसर्च निर्देशक तथा अध्ययनकी प्रमुख लेखक डा.हाना काह्लियोभाले भनिन्, ‘वनस्पतिमा आधारित खाना खाँदा क्यालोरी नगनी वा भोकै नबसी कसरी तौल घटाउन सकिन्छ भन्ने प्रश्नको यसले जवाफ दिन्छ।’

वेबसाइटका अनुसार, यो निष्कर्ष अधिक तौल भएका वयस्कहरूलाई सहभागी गराएर गरिएको १६ हप्ते अनियमित परीक्षणको विश्लेषणबाट आएको हो। सहभागीहरूलाई दुई समूहमा विभाजन गरिएको थियो।

एक समूहलाई फलफूल, तरकारी, अन्न र गेडागुडीमा आधारित इच्छाअनुसार खान मिल्ने कम बोसोयुक्त भेगन आहार दिइयो भने अर्को नियन्त्रण समूहले कुनै आहार परिवर्तन नगरी पहिलेझैं खाना खाएका थिए।

कुनै पनि समूहलाई क्यालोरीको निश्चित लक्ष्य दिइएको थिएन वा कति खाने भन्ने सीमा तोकिएको थिएन। अनुसन्धानकर्ताहरूले प्रत्येक सहभागीको दैनिक कुल क्यालोरी सेवनलाई उनीहरूले खाएको खानाको कुल तौलसँग तुलना गरेर ऊर्जा घनत्व मापन गरेका थिए।

दुवै समूहले खाएको खानाको कुल तौलमा उल्लेख्य परिवर्तन भएन। अर्थात्, भेगन आहार अपनाउनेहरूले पनि तौलका हिसाबले लगभग उस्तै मात्रामा खाना खाएका थिए।

दुवै समूहको क्यालोरी सेवन घट्यो, तर भेगन आहार अपनाउने समूहमा प्रतिदिन करिब ३५७ क्यालोरीले बढी कमी आएको थियो।

भेगन आहारमा मासु, दुग्धजन्य पदार्थ र अण्डाजस्ता बढी क्यालोरीयुक्त पशुजन्य खाद्यपदार्थ हटाइएको थियो। त्यसको सट्टा कम क्यालोरीमा बढी मात्रा उपलब्ध गराउने तरकारी र गेडागुडीको सेवन बढाइएको थियो।

यस्ता वनस्पतिजन्य खाद्यपदार्थमा सामान्यतया प्रति ग्राम क्यालोरी कम हुने भएकाले सहभागीहरूले पर्याप्त मात्रामा खाना खाँदा पनि समग्रमा कम ऊर्जा अर्थात् क्यालोरी लिन सकेका थिए।

अध्ययनका निष्कर्षले कम बोसोयुक्त भेगन आहारले खानाको ऊर्जा घनत्व उल्लेख्य रूपमा घटाउन सक्ने देखाएको छ। यसले मानिसलाई जानाजानी क्यालोरी सीमित नगरीकनै कम क्यालोरी सेवन गर्न र तौल घटाउन सहयोग गर्न सक्छ। स्रोतः एएनआई