काठमाडौँमा खाना पकाउने ग्यासको अभाव, सिलिन्डरका लागि घण्टौँ लाइन

काठमाडौँ उपत्यकामा खाना पकाउने एलपी ग्यासको अभाव देखिएपछि सर्वसाधारण सिलिन्डर लिन घण्टौँसम्म लाइनमा बस्न बाध्य भएका छन्।

सिफललगायत काठमाडौँका विभिन्न स्थानमा ग्यास वितरण केन्द्रमा सर्वसाधारणको लामो लाइन लागेको छ। ग्यास नपाउँदा विद्यार्थी, श्रमिक तथा डेरामा बस्नेहरू थप समस्यामा परेका छन्।

सिराहा घर भई काठमाडौँमा बसेर स्नातक तह अध्ययन गरिरहेका एक विद्यार्थीले आफू दुई–तीन दिनदेखि ग्यासको लाइनमा बसेको बताए। उनका अनुसार एक जनालाई एउटा मात्र सिलिन्डर दिने गरिएको छ।

‘२–३ दिनदेखि लाइनमा बसेको छु। एक जनालाई एउटा मात्र दिन्छ। साथीको कोठामा खाना बनाउँछु। अब ग्यास नपाए होटलमै खानुपर्ने अवस्था आउँछ, गाह्रो छ,’ उनले भने।

उनका अनुसार ग्यास १७ गतेपछि आउने र त्यसको भोलिपल्ट वा पर्सिपल्ट वितरण गरिने जानकारी आफूले पाएका छन्। ग्यासको अभावका कारण डेरामा बस्ने विद्यार्थी तथा अन्य सर्वसाधारणलाई दैनिक खाना पकाउन समस्या भएको उनले बताए।

यस्तै, गौशाला–तिलगंगामा बस्ने अस्गर अली पनि शुक्रबारदेखि ग्यासको प्रतीक्षामा छन्। उनी बिहान ७ बजेदेखि लाइनमा बसे पनि आइतबारसम्म आफ्नो पालो नआएको बताउँछन्।

‘तीन दिन भयो। आज मेरो पालो आउँदैन, पर्सि आउँछ भनिएको छ। सुगम र एभरेस्ट ग्यास पर्सि आउँछ भनिरहेका छन्,’ अलीले भने।

डिलरकहाँ ग्यास लिन जाँदा आफू नियमित ग्राहक नभएको भन्दै सिलिन्डर दिन आनाकानी गर्ने गरेको उनको गुनासो छ। ‘डिलरकहाँ जाँदा तिम्रो कस्टमर छैन, हामीसँग रासन लिँदैनौ, तिमीलाई किन ग्यास दिने भनेर भन्छन्,’ उनले भने।

ग्यासको आपूर्ति नियमित नहुँदा उपभोक्ताले लामो समय लाइनमा बस्नुपर्ने, पटक–पटक डिलर धाउनुपर्ने र अन्ततः महँगोमा खाना खानुपर्ने बाध्यता रहेको बताएका छन्।

उपभोक्ताले ग्यासको आपूर्ति सहज बनाउन, वितरण प्रणाली व्यवस्थित गर्न र सबै उपभोक्ताले सहज रूपमा सिलिन्डर पाउने व्यवस्था गर्न सम्बन्धित निकायसँग माग गरेका छन्।