बाढी प्रभावित क्षेत्रका सडक असोजभित्रै सञ्चालनमा ल्याउँछौँ: पूर्वाधारमन्त्री लम्साल

काठमाडौँ: सरकारले बाढी प्रभावित क्षेत्रका क्षतिग्रस्त सडक सञ्जाललाई आगामी असोजभित्रै सञ्चालनमा ल्याउने बताएको छ। तत्काल वैकल्पिक सडक सञ्चालन तथा तुइन र झोलुङ्गे पुल जडानलाई प्राथमिकता दिइएकोमा त्यसपछि पक्की सडक र पुल निर्माण गर्नेगरी काम तीव्र पारिएको पूर्वाधार विकासमन्त्री सुनिल लम्सालले बताएका छन्।

प्रधानमन्त्री वालेन्द्र शाहसँग प्रधानमन्त्री तथा मन्त्रिपरिषद्को कार्यालयमा सोमबार बाढी प्रभावित क्षेत्रका जनप्रतिनिधिहरूसँग भएको छलफलमा लम्सालले सडक तथा पुल निर्माणका लागि विभिन्न विषयगत ८ वटा कार्यदल बनाएर काम अघि बढाइएको जानकारी दिए।

उनले सडक तथा पुल निर्माणमा दोहोरोपना हुन नदिन स्थानीय जनप्रतिनिधिहरूलाई प्रत्यक्ष रूपमा सहयोग गर्न आग्रह गरे। प्रभावित क्षेत्रका क्षतिग्रस्त पूर्वाधारको विवरण संकलन, योजना निर्माण, निर्माण कार्यमा समन्वय तथा त्यसको फलोअपका लागि मन्त्रालय मातहतका निकायका प्रमुखहरूसँग काठमाडौंमै रहेर प्रत्यक्ष समन्वय गर्न पनि उनले जनप्रतिनिधिहरूलाई आग्रह गरेका छन्।

मन्त्री लम्सालका अनुसार प्रभावित क्षेत्रमा आगामी मंसिरसम्म खानेपानी प्रणाली पुनःस्थापना गर्ने गरी काम भइरहेको छ। स्वास्थ्य, शिक्षालगायतका पूर्वाधार निर्माणको काम पनि सरकारले अघि बढाइरहेको उनले बताए।

छलफलमा सहभागी नुवाकोटका प्रतिनिधिसभा सदस्य तथा सूचना तथा सञ्चारमन्त्री विक्रम तिमिल्सिनाले प्रभावित क्षेत्रमा गैरसरकारी संस्थाहरूले घर बनाइदिने तथा ज्येष्ठ नागरिक र बालबालिकालाई संरक्षण गर्ने आश्वासन दिँदै हिँडेको भन्दै त्यस्ता संस्थाले राष्ट्रिय विपद् जोखिम न्यूनीकरण तथा व्यवस्थापन प्राधिकरणसँगको समन्वयमा मात्रै काम गर्नुपर्ने बताए।

उनले प्रभावित क्षेत्रका कुनै पनि पीडित नछुट्ने गरी जनप्रतिनिधिहरूले तथ्यांक संकलन गरेर समयमै सरकारलाई उपलब्ध गराउनुपर्नेमा पनि जोड दिए।