चाँडपर्वमा काठमाडौँमा ३,५०६ प्रहरी परिचालन हुने, ड्रोन उडाएर निगरानी राखिने

काठमाडौँ: दसैं, तिहार तथा छठ पर्वलाई लक्षित गर्दै काठमाडौँमा कडा सुरक्षाको तयारी प्रहरीले गरेको छ। शुक्रबार पत्रकार सम्मेलन गरी परिसरले चाडपर्वका समयमा हुनसक्ने आपराधिक गतिविधि नियन्त्रण, नागरिकको सुरक्षा तथा आवागमनलाई सहज बनाउन काठमाडौँ जिल्लाभर ३ हजार ५०६ प्रहरी परिचालन गर्ने जानकारी दिएको हो।

जिल्ला प्रहरी परिसर काठमाडौँले तयार पारेको ‘चाडपर्व लक्षित विशेष सुरक्षा योजना–२०८३’ अनुसार सुरक्षा योजना २०८३ असोज १६ गतेदेखि पुस ३० गतेसम्म लागू हुनेछ। आवश्यकताअनुसार तालुक कार्यालयबाट थप जनशक्ति तथा रिजर्भ टोलीसमेत माग गरिने उल्लेख छ।

योजनाअनुसार मन्दिर सुरक्षा, खसी बजार, रात्री गस्ती, सीआरभी परिचालन, संवेदनशील तथा बढी भीडभाड हुने स्थानमा विशेष ड्युटी परिचालन गरिनेछ। चाडपर्वका क्रममा सार्वजनिक भीडभाड हुने स्थान, एम्बुलेन्स सञ्चालन, घरदैलो कार्यक्रम, समुदाय–प्रहरी साझेदारी, बजार अनुगमन, ‘डग स्निफिङ’ र कार्यालय सुरक्षालाई समेत प्राथमिकतामा राखिएको छ।

प्रहरीले चाडपर्वका समयमा हुनसक्ने हत्या, बलात्कार, मानव बेचबिखन, चोरी, पाकेटमारी, लुटपाट, अपहरण, धम्की, जुवा तथा लङ्गुरबुर्जा, नक्कली नोट तथा वैदेशिक मुद्रा ठगी र पेय पदार्थ तथा लागुऔषध मिसावट लगायतका गतिविधिलाई प्रमुख सुरक्षा चुनौतीका रूपमा पहिचान गरेको छ।

त्यसैगरी पटका तथा आतसबाजीबाट आगलागी वा दुर्घटना, मदिरा सेवनपछि सवारी दुर्घटना, नक्कली टिकट तथा यात्रु ठगी, घर बन्द रहेको अवस्थामा चोरी र खसी बजार तथा मेलामा अत्यधिक भीड हुनसक्ने जोखिमलाई पनि योजनामा समेटिएको छ।

प्रहरीले धार्मिक स्थलतर्फ पशुपतिनाथ, गुहेश्वरी, दक्षिणकाली लगायतका स्थानलाई संवेदनशील क्षेत्रका रूपमा राखेको छ। त्यस्तै न्युरोड, असन, कोटेश्वर, कलंकी, नयाँ बसपार्क, बालाजु तथा प्रमुख बजार र सपिङ मलहरूमा विशेष सुरक्षा व्यवस्था गरिनेछ।

सरकारी तथा निजी कार्यालय, बैंक तथा एटीएममा समेत सुरक्षा निगरानी बढाइनेछ।

चाडपर्वमा घर जाने तथा फर्किने यात्रुको सहजताका लागि कलंकी, कोटेश्वर, गौशाला, गोंगबु बसपार्क, बीजी मल लगायतका स्थानमा यात्रु तथा नागरिक सहायता कक्ष स्थापना गर्ने योजना छ।

यसका अतिरिक्त २५ वटा सामुदायिक सेवा केन्द्रमार्फत सेवा प्रदान गर्ने र घटना भएको स्थानमा ५ देखि १० मिनेटभित्र पुग्ने गरी सुरक्षा व्यवस्थापन गर्ने लक्ष्य राखिएको छ।

सुरक्षा व्यवस्थापनमा प्रविधिको प्रयोगलाई समेत प्राथमिकता दिइएको छ। योजनाअनुसार काठमाडौँमा १४२ वटा सीसीटीभीमार्फत् निगरानी राखिनेछ। यस्तै ३ वटा ड्रोन उडाएर सुरक्षा निगरानी राखिने प्रहरीले जनाएको छ। यसबाहेक तालिमप्राप्त ‘के–९ डग युनिट’ परिचालन गरिनेछ।

काठमाडौँका प्रमुख नाका, बढी भीडभाड हुने तथा अन्य संवेदनशील स्थानमा डग ह्यान्डलरसहितको टोलीबाट नियमित ‘डग स्निफिङ’ गरिनेछ।

प्रहरीका अनुसार चाडपर्वका क्रममा मोबाइल गस्ती, पिकेट, पैदल गस्ती, स्ट्राइकिङ, रिजर्भ, सीआरभी, क्विक रेस्पोन्स टिम ट्राफिकसहितको संयुक्त चेकिङ, सादा पोसाकका प्रहरी र यात्रु/नागरिक सहायता कक्ष परिचालन गरिनेछ।