होटल क्षेत्रमा आक्रामक लगानी विस्तार गर्दै बस्नेत, १.६६ अर्बमा इटहरीमा लक्जरी रिसोर्ट बनाउँदै

काठमाडौँ: पर्यटन व्यवसायी देशबन्धु बस्नेतले आक्रामण रूपमा लगानी विस्तार गरिरहेका छन्। राजधानीको सुकेधारामा पाँचतारे मर्क्युर होटल सञ्चालन गरेका बस्नेतले इटहरीमा ग्रान्ड सेन्ट्रल होटल पनि सञ्चालनमा ल्याइसकेका छन्।

यसैगरि व्यवसायी बस्नेतले इटहरीमा लक्जरी रिसोर्ट निर्माण गरिहेका छन्। उनको यो तेस्रो होटल हो। रिसोर्ट बनाउन १ अर्ब ६६ करोड रूपैयाँ खर्च हुने अनुमान गरिएको छ।

जसअनुसार ७५ प्रतिशत ऋण र २५ प्रतिशत संस्थापकको स्वपुँजी (इक्विटी) हुने गरि लगानी संरचना बनाइएको छ। कुल ४२ करोड २० लाख रूपैयाँ स्वपुँजी (इक्विटी) छ भने १ अर्ब २४ करोड रूपैयाँ ऋण लगानी हुने भएको छ।

होटल परियोजनाको हालसम्म १६ प्रतिशत वित्तीय प्रगति भएको एबी हस्पिटालिटी प्रालिले जनाएको छ। सन् २०२८ को अन्तिममा सक्ने लक्ष्य रहेको एबी हस्पिटालिटीले जनाएको छ।

कुल लगातमध्ये २६ करोड रूपैयाँ खर्च भइसकेको छ। जग्गा प्राप्तिको काम ९८ प्रतिशत सकिएको छ। यस्तै होटलको सिभिल निर्माणको काम सुरु हुन बाँकी रहेको छ।

रिसोर्टमा ३० वटा विलासी कोठा र भिल्लाका साथै ३ हजार जना क्षमता भएको सम्मेलन हल तथ भोज हल (कन्भेन्सन एण्ड ब्यान्क्वेट हल)का साथै रेस्टुरेन्ट तथा बारहरू, स्पा तथा वेलनेस सुविधाहरू, स्वीमिङ पूल, आकर्षक बगैँचा तथा बाहिरी कार्यक्रम स्थल समावेश हुने भएको छ।

होेटलले उच्चस्तरीय नेपाली तथा भारतीय ग्राहक, कर्पोरेट तथा सरकारी कार्यक्रम, वैवाहिक गन्तव्य (डेस्टिनेसन वेडिङ), सम्मेलन तथा अन्य ठूला भेलाहरूलाई लक्षित गरेको छ।

होटलको बहुमत स्वामित्व बस्नेतसँग रहेको छ। उनको ७४ प्रतिशत बढी छ। एबी इन्भेस्टमेन्ट होल्डिङ प्राइभेट लिमिटेडसँग २५.५३ प्रतिशत हिस्सा रहेको छ। कम्पनीको कुल चुक्तापुँजी १५ करोड ७० लाख रूपैयाँ छ।

निर्माणको तयारीमा रहेको रिसोर्ट पूर्वी नेपालमा व्यवस्थित बैठक, प्रोत्साहन भ्रमण, सम्मेलन र प्रदर्शनी (माइस) पूर्वाधारको सीमिततालाई सम्बोधन गर्नेगरी ठूलो क्षमताको यो प्रस्तावित सम्मेलन केन्द्र विवाह, प्रदर्शनी, सांगीतिक कार्यक्रम तथा अन्य ठूला भेलाहरू आयोजना गर्न उपयुक्त हुने गरी तयार पारिने एबी हस्पिटालिटीले जनाएको छ।

यसका साथै, विलासी तथा सांस्कृतिक सम्पदा झल्किने डिजाइन, आवास, खानपान, वेलनेस र खुला स्थानमा कार्यक्रम गर्न मिल्ने सुविधाहरूको संयोजनले यस क्षेत्रमा मुख्यतया ट्रान्जिट र व्यावसायिक यात्रुहरूलाई सेवा दिने परम्परागत होटलहरूभन्दा पृथक् बनाउने अपेक्षा गरिएको छ।

रिसोर्ट परियोजना इटहरीमा अवस्थित छ। जुन पूर्व–पश्चिम राजमार्ग र कोशी राजमार्गलाई जोड्ने एक प्रमुख केन्द्रबिन्दु हो। यहाँबाट विराटनगर, धरान तथा नेपाल–भारत सीमाका प्रमुख नाकाहरू नजिक पर्दछन्। विराटनगर विमानस्थल तथा बागडोग्रा र पूर्णियाजस्ता भारतीय प्रवेशद्वारहरूसँगको सहज पहुँचले यसका लक्षित स्वदेशी तथा भारतीय ग्राहकहरूसम्म पुग्न मद्दत पुर्याउने छ।

बस्नेत एक स्थापित पर्यटन व्यवसायी तथा युवा उद्यमी हुन्। उनी मुख्यतया पूर्वाधार विकास, पर्यटन र होटल व्यवसायमा ठूलो लगानी गर्ने समूह एबी होल्डिङ्सका अध्यक्ष हुन्।

अन्तर्राष्ट्रिय होटल चेनहरू नेपालमा बहुराष्ट्रिय होटल ब्रान्डहरू भित्र्याउन उनको महत्त्वपूर्ण भूमिका छ। उनले काठमाडौँको सुकेधारामा फ्रान्सेली होटल चेन एकोर समूहसँग मिलेर मर्क्युर काठमाडौँ सञ्चालनमा ल्याएका छन्। इटहरीमा स्थापित रमाडा बाई विन्डह्याम होटलमा उनको सतप्रतिशत स्वामित्व छ।

यस्तै गोर्खामा मनाकामना रिट्रिट रिसोर्ट एन्ड स्पा र इटहरीमा एबी वर्ल्ड जस्ता ठूला हस्पिटालिटी परियोजनाहरू पनि उनको नेतृत्वमा अघि बढिरहेका छन्।