नियोफिन हायर पर्चेज एनपीएलको अफिसियल प्लाटिनम क्याप स्पोन्सर

नियोफिन हायर पर्चेज प्रालि नेपाल प्रिमियर लिग (एनपीएल) को तेस्रो संस्करणको अफिसियल प्लाटिनम क्याप स्पोन्सर बन्ने भएको छ। यससम्बन्धमा नियोफिन हायर पर्चेज, क्रिकेट एसोसिएसन अफ नेपाल (क्यान) र टिमसिम स्पोर्ट्स मार्केट्स प्रालिबीच त्रिपक्षीय सम्झौता भएको छ।

सम्झौताअनुसार नियोफिन हायर पर्चेजले आगामी तीन वर्षसम्म एनपीएलअन्तर्गत सञ्चालन हुने टी–२० क्रिकेट प्रतियोगिताको अफिसियल प्लाटिनम क्याप स्पोन्सरका रूपमा साझेदारी गर्नेछ।

साझेदारीअन्तर्गत प्रत्येक सिजनको प्रतियोगितामा सबैभन्दा बढी रन बनाउने ब्याटरलाई नगद दुई लाख रुपैयाँ पुरस्कारसहित नियोफिनको लोगो अंकित क्याप प्रदान गरिनेछ।

एनपीएलको तेस्रो संस्करण सन् २०२६ अक्टोबर २६ देखि नोभेम्बर २१ सम्म काठमाडौंको कीर्तिपुरस्थित त्रिवि अन्तर्राष्ट्रिय क्रिकेट रंगशालामा आयोजना हुँदैछ।

सम्झौताबारे प्रतिक्रिया दिँदै नियोफिन हायर पर्चेज प्रालिका प्रमुख कार्यकारी अधिकृत राजेन्द्र प्रसाद तिम्सिनाले नेपाली क्रिकेटको विकासमा योगदान पुर्‍याउन एनपीएलसँग साझेदारी गर्न पाउँदा गौरवान्वित भएको बताए। उनले प्रतियोगितामा सबैभन्दा बढी रन बनाउने ब्याटरलाई सम्मान गर्ने क्यापले उत्कृष्टता, निरन्तरता र लगनशीलताको प्रतिनिधित्व गर्ने उल्लेख गरे।

उनका अनुसार यस साझेदारीले खेलकुद क्षेत्रको विकासमा योगदान पुर्‍याउने कम्पनीको प्रतिबद्धतालाई थप बलियो बनाउनेछ।

क्रिकेट एसोसिएसन अफ नेपाल र टिमसिम स्पोर्ट्स मार्केट्स प्रालिले पनि यस सहकार्यले एनपीएलको स्तरवृद्धि तथा नेपाली क्रिकेटको प्रवर्द्धनमा सकारात्मक योगदान पुर्‍याउने विश्वास व्यक्त गरेका छन्।

नियोफिन हायर पर्चेज नेपाल राष्ट्र बैंकबाट इजाजतप्राप्त हायर पर्चेज कारोबार गर्ने गैरबैंकिङ वित्तीय संस्था हो। जुन क्यापिटल एन्ड मर्चेन्ट बैंकिङ समूहअन्तर्गत सञ्चालित छ। यसअघि बतास हायर पर्चेजका नामबाट सञ्चालन हुँदै आएको कम्पनीले नयाँ ब्रान्ड पहिचानसहित नियोफिनका रूपमा सेवा विस्तार गरेको हो। कम्पनीले काठमाडौं र पोखरास्थित शाखा कार्यालयमार्फत ग्राहकलाई वित्तीय सेवा प्रदान गर्दै आएको छ।