नेपालले भारतलाई दियो १६८ रनको लक्ष्य

काठमाडौँ- एसीसी इमर्जिङ टिम्स एसिया कप क्रिकेटमा नेपालले भारतको ए टिमलाई १६८ रनको लक्ष्य दिएको छ।

श्रीलंकाको राजधानी कोलोम्बोस्थित आर प्रेमादास स्टेडियममा टस जितेर पहिले ब्याटिङ गरेको नेपाल ३९.२ ओभरसम्म मात्रै टिकेर १६७ रन बनाएको हो।

कप्तान रोहित पौडेलले सर्वाधिक ६५ रन बनाउँदा गुल्सन झाले ३८ रन बनाए। १० ओभरत्रिभै ५ विकेट गुमाउँदा जम्मा ३७ रन मात्र बनाएको अवस्थामा कप्तान रोहितले दुई अर्धशतकीय साझेदारी गरे ।

दोस्रो बलमै ओपनर कुशल भुर्तेल खाता नखोली आउट भएका थिए। त्यसपछि आसिफ शेख र देव खनालले २७ रनको साझेदारी गर्दै इनिङ्स सम्हाल्ने प्रायस गरेका थिए।

तर आसिफ छैटौं ओभरमा व्यक्तिगत ७ रनमा आउट भए। त्यसपछि नेपालले लगातार चार विकेट गुमायो। देव १५, भीम सार्की ४ रनमा बउट भए भने कुशल मल्लले खाता खोल्न सकेनन्।

रोहित र सोमपाल कामीले ५३ रनको साझेदारी गरेका थिए। सोमपाल १४ रन बनाएर आउट भए। त्यसपछि रोहित र गुल्सनले ५४ रनको साझेदारी गरे।