इमर्जिङ टिम्स एसिया कपमा नेपालको सान्त्वना जित

काठमाडौं – एसीसी इमर्जिङ टिम्स एसिया कपको समूह चरणबाटै बाहिरिएको नेपालले अन्तिम खेलमा युएई ए माथि सन्त्वना जित निकालेको छ। श्रीलंकाको राजधानी कोलम्बोस्थित पि सारा ओभलमा टस जितेर पहिले ब्याटिङ गरेको युएई लाई तीन विकेटले ‍हराउँदै नेपालले जित निकालेको हो।

नेपालका ओपनिङ ब्याटर कुशल भुर्तेलले सानदार खेल प्रस्तुत गरेपछि नेपालले सहज जित निकाल्यो। पहिले फिल्डिङ गरेको नेपालका लागि कुशलले ६ विकेट लिएसँगै निर्धारित ५० ओभर नखेल्दै युएईलाई आलआउट गराएको थियो। ४४ ओभर खेल्दै सम्पूर्ण विकेट गुमाएर युएईको ए टिमले १५७ रन बनाएपछि नेपालले १५८ रन को लक्ष्य पाएको थियो। जवाफमा २३ ओभर खेल्दै सात विकेट गुमाएर १५९ रन बनाएपछि तीन विकेटको जित निकालेको हो।

बलिङमा कन्सिस्टेन्ट प्रदर्शन गरेको नेपालका कुशल भुर्तेलले ६ विकेट गिराउँदा मौसम ढकालले दुई विकेट लिए। त्यस्तै, कुशल मल्लले एक र पवन सर्राफले पनि एक विकेट लिए।

नेपालविरुद्ध लभप्रित बजवाले ५२ रन बनाए भने १४ रन बनाएर अर्का ओपनर आर्यन्स शर्मा पनि आउट भए।

तेस्रो नम्बरमा मैदान पसेका अन्स टन्डनले तीन रन बनाएर आउट भए। इथन कार्ल डिसुजाले १८ रन बनाए भने अशवन्थ थापाले १६ रनको योगदान दिए। खेलमा जस जियानीले १३ रन बनाउनुबाहेक अन्य खेलाडीले दोहोरो अंकमा रन बनाउन सकेनन्।

जवाफमा ओपनर अर्जुन साउँद गोल्डेन डगआउट भए। उनी पहिलो बलमा नै आउट भएपछि नेपालले रन बनाउन नसक्दै पहिलो विकेट गुमाएको छ।

युएई ए ले दिएको १५८ रनको लक्ष्य पछ्याउने क्रममा अर्जुन साउँद आउट भएपछि नेपाली टिमको ब्याटिङमा देव खनाल आएका थिए। देवले कुशलसँगै ९८ रनको साझदारी गरे। त्यसक्रममा कुशल ७१ रन बनाएर आउट भए। कुशल ४३ बलमै सो रन जोडेर आउट भएका हुन्। नौ चौका र छ छक्का प्रहार गरेर कुशल आउट भएका थिए।

त्यसलगत्तै देव खनाल २४ रन बनाएर आउट भए। यिदुवै खेलाडीलाई युएईका मोहम्मद फराजुदिनले एकै ओभरमा आउट गराएका थिए।

१५ औं ओभर चलिरहेको समयमा नेपालले तीन विकेट गुमाएर १०३ रन बनाएको थियो। पछि फाराजुद्दिनले सन्दिप जोरा र गुल्सन झालाई पनि आउट गराएका थिए। छ ओभर बलिङ गरेका उनले २८ रन खर्चिएर चार विकेट गिराएका हुन्। त्यसैगरी मोहम्मद जवादुल्लाहले पनि दुई विकेट गिराएका थिए।

नेपालले यसअघिका दुवै खेलमा हार बेहोरेको थियो। समूह बीमा रहेको नेपालको समूहमा भारत ए र पाकिस्तान एसमेत थिए। नेपालले पाकिस्तानसँग चार विकेटको हार बेहोरेको थियो भने भारतले नेपाललाई ९ विकेटले हराएको थियो। सुरुका दुई खेलमा हार बेहोरेपछि नेपाल प्रतियोगितबाटै बाहिरिएको थियो।