मनसुनजन्य विपद्: ज्यान गुमाउनेको संख्या ५० पुग्यो

काठमाडौं– नेपालमा मनसुन भित्रिएको समय ३१ जेठयतादेखि १४ साउनसम्म ५० जनाको ज्यान गएको र २५ बेपत्ता भएको राष्ट्रिय विपद् जोखिम न्यूनीकरण तथा व्यवस्थापन प्राधिकरणले विवरण सार्वजनिक गरेको छ। बाढीपहिरो तथा चट्याङबाट अहिलेसम्म ५० जनाको मृत्यु भएको हो।

मनसुनजन्य विपद्का कारण साढे ९ अर्बभन्दा बढीको क्षति अनुमान गरिएको प्राधिकरणका प्रवक्ता ध्रुवबहादुर खड्काले बताए। उनका अनुसार पहिरोमा परेर २४, चट्याङले १९ र बाढीले बगाएर सात जनाको ज्यान गएको छ।

चट्याङका कारण ४२, पहिरोबाट २३ र बाढीबाट पाँच जना घाइते भएको उनको भनाइ छ। सबैभन्दा बढी बाढीबाट २० जना बेपत्ता भएको प्राधिकरणको तज्यांक छ। मनसुनजन्य गतिविधिका कारण अहिलेसम्म साढे ९ करोड बढीको निजी सम्पत्तिमा क्षति पुगेको प्राधिकरणका प्रवक्ता खड्काले बताए।

उनका अनुसार बाढीपहिरोका कारण सडकमा ४० करोड बढीको क्षति र बाढीका कारण ४७० मेगावाटका ६१ जलविद्युत् आयोजनामा ९ अर्बको क्षति अनुमान गरिएको छ।