उत्तराखण्डको गौरीकुण्डमा पहिरो: १७ नेपाली बेपत्ता भएको पुष्टि

काठमाडौं– भारतको उत्तराखण्डमा ठूलो वर्षापछि आएको बाढीपहिरोका कारण १७ नेपालीसहित १९ जना बेपत्ता भएको भारतीय सञ्चार माध्यमले पुष्टि गरेका छन्। रोजगारीका लागि उत्तराखण्डको गौरीकुण्डमा रहेका १७ नेपाली अकस्मात आएको बाढीपहिरोमा परेर बेपत्ता भएका हुन्।

बेपत्ता हुनेमा जुम्लाका चन्द्र कामी, उनका छोरा लालबहादुर कामी, सुखरा रावत र उनका छोरा जोरा रावतलगायत सात जना, हुम्लाका १० र दुई जना भारतीय नागरिक रहेको भारतीय सञ्चार माध्यममा उल्लेख छ।
उत्तराखण्ड राज्यको गौरीकुण्डमा होटल सञ्चालन गर्दै आएका हुम्लाका वीरबहादुरको होटलमा खाना खान लागेका बेला पहिरोले होटलै बगाएको थियो। पहिरोमा होटल सञ्चालक वीरबहादुरसहित उनकी पत्नी सुमित्रा, छोरी निशा र छोरा हरिबहादुर पनि बेपत्ता भएका छन्।

पहिरोले बगाएको होटलमा खाना खान गएका धर्मराज बुढा र उनका छोरा मानबहादुर बुढा, अमर बोहरा, उनका छोरा मानबहादुर, पृथ्वी, जटिल र वकिल, पत्नी अनिता, छोरीद्वय राधिका र पिंकी पनि बेपत्ता भएका छन्।

उत्तराखण्डको पहिरोमा परेर १७ नेपाली बेपत्ता भएपछि खोज तथा उद्धारका लागि भारत सरकार र त्यहाँको स्थानीय निकायसँग निरन्तर सम्पर्कमा रहिरहेको गृह मन्त्रालयका प्रवक्ता नारायणप्रसाद अधिकारीले बताए।

उत्तराखण्ड गौरीकुण्डको स्थानीय प्रशासनसँग निरन्तर सम्पर्कमा रहेर जिल्ला प्रशासन कार्यालय कञ्चनपुरले पनि पहिरोमा परेर बेपत्ता नेपालीको खोज तथा उद्धारका लागि पहल गरिरहेको उनले जानकारी दिए।परराष्ट्र मन्त्रालयमार्फत पनि भारत सरकारसमक्ष लिखित पत्राचारसमेत भइसकेको बताइएको छ। निरन्तर वर्षाका कारण खोज तथा उद्धारमा गाह्रो भइरहेको उत्तराखण्ड प्रहरी बताएको भारतीय सञ्चार माध्यमले उल्लेख गरेका छन्।