७० अर्ब पुग्यो वाणिज्य बैंकहरूको नाफा

काठमाडौं- नेपालका वाणिज्य बैंकको नाफा ७० अर्ब १ करोड रुपैयाँ पुगेको छ। सम्बन्धित बैंकहरुले सार्वजनिक गरेको गत आर्थिक वर्ष २०७९/८० को अपरिष्कृत वित्तीय विवरणअनुसार बैंकहरूले गत वर्ष ७० अर्ब १ करोड रुपैयाँ नाफा कमाएका हुन्।

अघिल्लो आर्थिक वर्षको तुलनामा अधिकांश वाणिज्य बैंकहरूको खुद नाफा बढेपनि वितरणयोग्य नाफामा भने कमी देखिएको छ। सबैभन्दा धेरै खुद नाफा कमाउने बैंकको सूचीमा नबिल शीर्ष स्थानमा छ भने नबिललाई ग्लोबलले पछ्याएको छ। अघिल्लो आर्थिक वर्षको तुलनामा ७६.७० प्रतिशतले नाफा बढाएर नबिलले ७ अर्ब ५२ करोड रुपैंयाँ खुद नाफा कमाएको छ।

यस्तै दोस्रो स्थानमा रहेको ग्लोबल आईएमई बैंकले ७ अर्ब २५ करोड रुपैयाँ खुद नाफा गरेको छ। अघिल्लो आर्थिक वर्ष ४ अर्ब ९५ करोड खुदा नाफा कमाएको बैंकको नाफा ४६.२६ प्रतिशतले बढेको छ।

त्यस्तै तेस्रो स्थानमा सरकारी स्वामित्वको राष्ट्रिय वाणिज्य बैंक छ। बैंकले गत वर्ष खुद नाफा ४ अर्ब ९१ करोड रुपैयाँ कमाएको छ।

एनआईसी एसिया बैंकले गत आर्थिक वर्ष २०७९/०८० मा ४ अर्ब ६५ करोड १३ लाख ३८ हजार रुपैयाँ खुद नाफा गरेको छ। पाँचौ स्थानमा रहेको नेपाल इन्भेष्टमेन्ट मेघा बैंकले ४ अर्ब २९ करोड रुपैयाँ नाफा गरेको छ। स्ट्ण्डयार्ड चार्टर्ड बैंकले गत आर्थिक वर्ष ३ अर्ब ५२ करोड नाफा गरेको छ।

यस्तै एनएमबी बैंकले ३ अर्ब ४१ करोड रुपैंयाँ खुद नाफा आर्जन गरेको छ। नेपाल बैंक लिमिटेडले गत आवमा बैंकले ३ अर्ब ४१ करोड खुद नाफा गरेको छ।
हिमालयन बैंक लिमिटेडले गत आर्थिक वर्ष ३ अर्ब २६ करोड ६१ लाख खुद नाफा कमाएको छ। आर्थिक वर्ष २०७९/८० मा एभरेष्ट बैंकले ३ अर्ब ३९ करोड रुपैयाँ खुद नाफा गरेको छ।

सिद्धार्थ बैंकले गत आर्थिक वर्ष ३ अर्ब १९ करोड रुपैयाँ खुद नाफा गरेको छ। कृषि विकास बैंकले गत आर्थिक वर्ष करिब ३ अर्ब १० करोड रुपैयाँ खुद नाफा गरेको छ।

सानिमा बैंकले २ अर्ब ६१ करोड रूपैयाँ खुद नाफा कमाएको छ। प्रभु बैंकले खुद नाफा २ अर्ब ८२ करोड रुपैयाँ कमाएको छ।

सिटिजन्स बैंक इन्टरनेशनलले गत वर्ष करिब साढे २ अर्ब रूपैयाँ नाफा गरेको छ। माछापुच्छ्रे बैंकले १ अर्ब ८५ करोड खुद नाफा आर्जन गर्न सफल भएको छ। लक्ष्मी सनराइज बैंक लिमिटेडले २ अर्ब २६ करोड १८ लाख रुपैयाँ खुद नाफा कमाएको छ।

यता प्राइम कर्सियल बैंकले गत आर्थिक वर्ष २ अर्ब २६ करोड रुपैयाँ नाफा कमाएको छ। कुमारी बैंक लिमिटेडले १ अर्ब ९५ करोड ७१ लाख रुपैयाँ खुद नाफा कमाएको छ।