संखुवासभा कैदी ‘हत्या’ प्रकरण : कारागार प्रमुख र सुरक्षाकर्मीविरुद्ध किटानी जाहेरी

खाँदबारी– संखुवासभा कारागारमा दुईजना कैदीको मृत्यु भएको प्रकरणमा मृतकका आफन्तले कारागार प्रमुख र सुरक्षाकर्मीहरूका विरूद्ध प्रहरीमा किटानी जाहेरी दिएका छन्।

जिल्ला कारागारका निमित्त प्रमुख राजेन्द्र घिमिरे र कारागार सुरक्षा प्रमुख प्रहरी सहायक निरीक्षक लक्ष्मी चौधरीलगायत सुरक्षाकर्मीविरुद्ध पीडितका आफन्तले जिल्ला प्रहरी कार्यालय संखुवासभामा शनिवार किटानी जाहेरी दर्ता गराएका हुन्।

दुवै मृतकका परिवार सदस्यलाई एड्भोकेसी फोरम–नेपालका अधिवक्ता कुमारप्रसाद थपलियाले जाहेरी दराखस्त तयार पार्न कानुनी सहयोग गरेका थिए।

जिल्ला कारागार संखुवासभामा दुईजना कैदीको बुधवार बिहान कुटपिटबाट मृत्यु भएको थियो। निर्घात कुटपिटबाट मृत्यु भएका कैदीहरू संखुवासभाको मादी नगरपालिका–५ का १९ वर्षीय विनोद तोलाङ्गी र नुवाकोटको ककनी गाउँपालिका–७ का २८ वर्षीय आकाश बलामी हुन्।

मृतक कैदीहरूको शवपरीक्षण शनिवार गर्ने प्रमुख जिल्ला अधिकारी शिव कार्कीले जानकारी दिएका छन्।

कारागारमा रहेको सीसीटिभी फुटेज अध्ययन गरेपछि प्रहरीले कैदीमाथि कुटपिट गरेको देखिएकाले कारागारको सुरक्षामा खटिएका १० प्रहरीसहित १५ जनालाई नियन्त्रणमा लिएर घटनाको अनुसन्धान सुरु गरेको प्रहरीले बताएको छ। कारागारको सुरक्षामा प्रहरी सहायक निरीक्षकको नेतृत्वमा २० प्रहरी परिचालन गरिएका थिए।

घटनापछि जिल्ला सुरक्षा समितिले सहायक प्रमुख जिल्ला अधिकारी मोहनमणि घिमिरेको नेतृत्वमा बुधबार तीन सदस्यीय छानबिन समिति बनाएको छ। समितिमा जिल्ला प्रहरी कार्यालयका प्रहरी निरीक्षक सरोज खनाल र प्रशासन कार्यालयका नायव सुब्बा तारणी घिमिरे सदस्य छन्।

त्यस्तै गरी कोशी प्रदेश प्रहरी कार्यालयले पनि प्रहरी उपरीक्षक ऋषिराम कँडेलको नेतृत्वमा चार सदस्यीय छानबिन समिति बनाएको छ। समितिमा प्रहरी निरीक्षक जितेश दाहाल, प्रहरी नायब निरीक्षक रुद्रबहादुर खड्का र हवल्दार तीर्थ भट्टराई सदस्य छन्।

घटनामा गृह मन्त्रालयले समेत छानबिन समिति गठन गरेको छ। गृह मन्त्रालयले कारागार व्यवस्थापन विभागका निर्देशक एवं प्रवक्ता कमलप्रसाद पाण्डेको संयोजकत्वमा पाँच सदस्यीय छानबिन गठन गरेको छ।

समितिमा नेपाल प्रहरीका प्रहरी नायब उपरीक्षक कौशलकुमार बुढाथोकी, राष्ट्रिय अनुसन्धानका नायब उपरीक्षक कुमार बुढाथोकी, कारागार विभागका कानुन अधिकृत तुलबहादुर खड्का र जिल्ला प्रशासन कार्यालय सङ्खुवासभाका प्रशासकीय अधिकृत सदस्य छन्। गृह मन्त्रालयको छानबिन टोली शुक्रबार सङ्खुवासभा आइपुगेको छ। टोलीले अनुसन्धान सुरु गरेको छ।

अहिले सङ्खुवासभा कारागारमा आठ महिलासहित एक सय ३६ कैदीबन्दी छन्।