समाजवादी मोर्चाको बैठक बस्दै

काठमाडौं– नेकपा माओवादी केन्द्रका अध्यक्ष एवं प्रधानमन्त्री पुष्पकमल दाहाल प्रचण्डको योजनामा गठन गरिएको सत्तारुढ चार दल सम्मिलित समाजवादी मोर्चाको बैठक आज बस्दै छ। आइतबार बस्ने भनिएको बैठक आजका लागि सरेको हो।

बिहान साढे ७ बजेदेखि नेकपा एकीकृत समाजवादी पार्टीको तीनकुनेस्थित केन्द्रीय मुख्यालय आलोकनगरमा बस्ने बुझिएको छ। बैठकले मोर्चाका उद्देश्य जनतामाझ लैजान सातै प्रदेशमा गरिने सभाको मिति तोक्ने र सरकारका गतिविधि, समसामयिक राजनीतिक घटनाक्रमलगायत विषयमा छलफल हुने नेकपा एसका प्रवक्ता जगन्नाथ खतिवडाले बताए।

यसअघि प्रधानमन्त्री पुष्पकमल दाहाल प्रचण्डपत्नी सीता दाहालको निधन भएपछि मोर्चाको बैठक सरेको थियो। बैठक आइतबार बस्ने भनिए पनि तयारी नपुगेपछि सोमबार बिहानका लागि सारिएको हो ।
मोर्चा गठन भएको करिब तीन महिनापछि बस्न लागेको यो दोस्रो बैठक हो।

मोर्चामा नेकपा माओवादी केन्द्र, जनता समाजवादी पार्टी, नेकपा एकीकृत समाजवादी र विप्लव नेतृत्वको नेकपा रहेका छन्। सरकारको नेतृत्वकर्ता माओवादी केन्द्रसहित चार दलले गत ४ असारमा समाजवादी मोर्चा घोषणा गरेका थिए।