अन्ततः रास्वपाले फिर्ता लियो उम्मेदवारी, उद्योग समितिमा पनि खान निर्विरोध

काठमाडौँ-  जनमत पार्टीका उपाध्यक्ष अब्दुल खान उद्योग तथा वाणिज्य र श्रम तथा उपभोक्ता हित समितिको सभापतिमा निर्विरोध भएका छन्।

राष्ट्रिय स्वतन्त्र पार्टीका उम्मेदवार गणेश पराजुलीले उम्मेदवारी फिर्ता लिएपछि खान सर्वसम्मत सभापति चुनिएका हुन्। प्रतिनिधि सभाका ९ वटा विषयगत समितिको सभापति आइतबार नै निर्विरोध भइसकेका छन्।

आइतबार नै सार्वजनिक लेखा समिति सभापतिमा ऋषिकेश पोखरेल र महिला बालबालिका तथा सामाजिक समितिको सभापतिमा किरण साह सर्वसम्मत भए। उनीहरू एमालेका सांसद हुन्।

कृषि, सहकारी तथा प्राकृतिक स्रोत समितिमा कांग्रेसकी आरजू राणा देउवा सर्वसम्मत हुँदा कांग्रेसकै रामहरि खतिवडा राज्य व्यवस्था समिति सभापति बने। सन्तोष चालिसे अर्थ समितिको सभापतिमा सर्वसम्मत भएका छन्।

कानुन, न्याय तथा मानव अधिकार समितिको सभापतिमा माओवादी केन्द्रकी विमला सुवेदी, पूर्वाधार विकास समितिको सभापतिमा राप्रपाका दीपकबहादुर सिंह, अन्तर्राष्ट्रिय सम्बन्ध र पर्यटन समितिको सभापतिमा जसपाका राजकिशोर यादव, स्वास्थ्य तथा सूचना प्रविधि समितिको सभापतिमा एकीकृत समाजवादीका भानुभक्त जोशी सर्वसम्मत भए।