भारतका एडीसी शिक्षार्थी भेटेपछि रक्षामन्त्रीले भेटे राष्ट्रपति

काठमाडौँ- रक्षामन्त्री पूर्णबहादुर खड्काले भारतीय एडीसीका शिक्षार्थीलाई भेटेपछि राष्ट्रपति रामचन्द्र पौडेलसँग भेटवार्ता गरेका छन्। उपप्रधानमन्त्रीसमेत रहेका खड्का सोमबार साँझ राष्ट्रपति कार्यालय शीतलनिवास पुगेका थिए।

भेटमा खड्काले देशको शान्ति सुरक्षा लगायतका विषयमा राष्ट्रपति पौडेललाई जानकारी गराएको मन्त्री खड्काको सचिवालयले जानकारी दिएको छ।

यसअघि खड्कासँग भारतको नेसनल डिफेन्स कलेज (एनडीसी) नयाँदिल्लीका एयर भाइस मार्सल मनिषकुमार गुप्ता, एभिडिएसएम, एसडिएस (एयर) एनडिसी नेतृत्वमा शिक्षार्थी सम्मिलित १६ सदस्यीय भ्रमणदलका सदस्यहरुले भेट गरेका थिए।

रक्षा मन्त्रालयमा भएको भेटघाटमा उपप्रधानमन्त्री खड्काले संयुक्त राष्ट्र संघको बडापत्र, असंलग्नता, पञ्चशील, अन्तर्राष्ट्रिय कानुन र विश्व शान्तिका मूल्यमान्यता नेपालको परराष्ट्र नीति संचालनका आधारहरुको रुपमा रहेको बताउँदै सार्वभौम समानता, क्षेत्रीय अखण्डता, पारस्परिक हित र पारस्परिक लाभले नेपालको परराष्ट्र सम्बन्धलाई मार्गदर्शन गरेको उल्लेख गरेका थिए। संयुक्त राष्ट्रसंघीय शान्ति अभियानमा सहभागी भएर नेपालले अन्तर्राष्ट्रिय शान्ति र सुरक्षामा विशेष योगदान दिएको उनको भनाइ थियो।

रक्षासँग सम्बन्धित अध्ययनको आवश्यकता सामान्य शैक्षिक संस्थाहरूले पूरा गर्न नसक्ने हुँदा विभिन्न देशहरुमा यससम्बन्धी संस्थाहरुको स्थापना र सञ्चालन भइरहेको सन्दर्भमा नेपालमा समेत रक्षासम्बन्धी अध्ययन संस्थाको आवश्यकता महसुस गरिएको उनको भनाइ थियो।

नेपाल र भारतबीचको कूटनीतिक सम्बन्ध तथा नेपाली सेना र भारतीय सेनाबीचको समन्वय सुमधुर रहेको उनको भनाइ थियो। भेटमा रक्षा मन्त्रालयका सहसचिव, परराष्ट्र मन्त्रालय तथा नेपालस्थित भारतीय दुतावासका अधिकारी एवम् नेपाली सेनाका अधिकृतसमेत सहभागी थिए।