जेठाजू र देवर चोरी गर्न सुरुङ खनेर घरभित्र छिरे, ब्युँझिएपछि हत्या गरेर फर्किए

काठमाडौं- असोज २ गते दिउँसो ३ बजे पर्सा जगरनाथपुर गाउँपालिका-५ मसिहानी टोलकी ५६ वर्षीया कान्तिदेवी विन आफ्नै घरमा मृत अवस्थामा फेला परिन्।

प्रहरीका अनुसार सुतेको कोठामा उनको घाँटी रेटी हत्या भएको थियो। उनको असोज १ गते राति पौने १२ बजे नै हत्या भएको थियो।

घटना अनुसन्धानका लागि पर्सा प्रहरीको टोलीले तालिमप्राप्त कुकुरसहितको टोली परिचालन गर्‍यो।

शव पोष्टमार्टमको लागि नारायणी अस्पताल वीरगन्ज पठाइयो। विनका छोरा अर्जुन मुखिया विन वैदेशिक रोजगारीको लागि मलेसियामा थिए। अर्का छोरा नारायणगढमा बस्थे।

श्रीमान् १० वर्षअघि बितेका थिए। कान्तिदेवी घरमा एक्लै बस्थिन्।

कान्तिदेवीको शव पोष्टमार्टमपछि उनकै जेठाजू चन्द्रिका राउत विनले बुझेर लगे। दाहसंस्कार गराए।

अर्जुन मलेसियाबाट फर्किएपछि लालबाबु राउत विनविरूद्ध असोज ७ गते किटानी जाहेरी दिए। ३६ वर्षीय लालबाबु कान्तिदेवीको नातामा देवर पर्ने व्यक्ति हुन्।

पर्सा प्रहरी प्रवक्ता प्रहरी नायब उपरीक्षक कुमारविक्रम थापाका अनुसार लालबाबुसँग बयान लिँदै जाँदा उनले कान्तिदेवीका जेठाजुहरू चन्द्रिका राउत विन र अमिरिकी राउत विनको संलग्नता खुलाए।

उनीहरू दुवैलाई प्रहरीले असोज १४ गते पक्राउ गरी अनुसन्धान थाल्यो। अनुसन्धानमा उनीहरू तिनै जनाले कान्तिदेवीको हत्या गरेको स्वीकार गरे।

सुरुङ खनेर चोरी गर्न छिरे, हत्या गरेर फर्किए

थापाका अनुसार तिनै जना कान्तिदेवीको घरमा राति पुगेका थिए। उनीहरू चोरी गर्ने योजना बनाएर कान्तिदेवीको घरमा प्रवेश गरेका थिए।

सुरूमा उनीहरूले घरमा सुरूङ खनेर भित्र छिरे। चोरी गर्नको लागि बाकसहरू खोतल्न थाले। त्यहीबेला कान्तिदेवी निद्राबाट ब्युँझिन्।

कान्तिदेवीले चिनेपछि पोल खुल्ने डरले तिनै जनाले उनको टाउकोमा रड र काठको फलेकले हिर्काए। कान्तिदेवी बेहोस् भइन्।

त्यसपछि उनीहरूले सिरानीले मुख थुनी खुर्पाले घाँटी रेटेर हत्या गरे।

५९ वर्षीय चन्द्रिका राउत विन र ५७ वर्षीय अमिरिका राउत विन कान्तिदेवीका सहोदर जेठाजू हुन्।

देवर नाताका लालबाबुको घर कान्तिदेवीकोबाट करिब दुई-तीन सय मिटर टाढा छ।

जेठाजुद्वयको घर पाँच सय मिटर टाढा छ। ‘कान्तिदेवीको घर अलि एकान्तमै छ, घटना हुँदा कसैले थाहा नपाएको देखियो,’ थापाले भने।

छोराले विदेशबाट पठाएको रकम ब्याजमा लगाएको थाहा पाएपछि तिनै जनाले उनको घरमा चोरी गर्ने योजना बनाएको थापाले बताए।

‘घरमा एक्लै बस्ने गरेकाले चोरी गर्न सजिलो हुने ठानेर गएका रहेछन्, सुरुङ खनेर भित्र छिरेर बाकस खोल्दैगर्दा कान्तिदेवीले थाहा पाएपछि पोल खुल्ने डरले हत्या गरेको अनुसन्धानमा देखिएको छ,’ थापाले भने।

कान्तिदेवीको हत्यापछि उनीहरू चोरी नगरी फर्किएको देखिएको थापाले बताए।

उनीहरू तिनै जनालाई प्रहरीले मंगलबार पत्रकार सम्मेलन गरी सार्वजनिक गरेको छ। सबैलाई कर्तव्य ज्यानमुद्दामा  हिरासतमा राखेर अनुसन्धान थालिएको थापाले बताए।