पीकेमा स्ववियु उपाध्यक्षमाथि हातपातको विरोध गर्दै प्रदर्शन

काठमाडौँ– काठमाडौंस्थित पद्मकन्या क्याम्पसमा विद्यार्थीहरुले प्रदर्शन गरेका छन्। केही समयअघि नेपाल विद्यार्थी संघको इकाइ सभापति सगुन कँडेलमाथि हातपात भएकोमा विरोध जनाउँदै नेपाली कांग्रेसका केन्द्रीय सदस्य कुन्दनराज काफ्ले निकट विद्यार्थीले प्रदर्शन गरेका हुन्।

विद्यार्थीहरुले कँडेलको ‘स्वास्थ्य लाभको कामना गर्दै प्लेकार्ड बोकेर क्याम्पसलाई शान्ति क्षेत्र बनाउन माग गर्दै प्रदर्शन गरेका हुन्। प्रदर्शन गरेका विद्यार्थीले निर्वाचन कार्यालयमा लगाएको तालासमेत फोडेका छन्।

केही समयअघि स्वतन्त्र विद्यार्थी युनियनमा नेपाल विद्यार्थी संघबाट समानुपातिक प्रतिनिधित्व कसले गर्ने भन्ने विषयमा विवाद बढ्दा इकाइ अध्यक्ष कँडेललाई अर्को समूहले कुटपिट गरेको थियो। रातको ७ बजेतिर क्याम्पसको होस्टेलमा बसिरहेको अवस्थामा कँडेलको कोठाभित्रै प्रवेश गरेर कुटपिट गरेको थियो।

आफूलाई नेविसंघकै इकाइ अध्यक्ष दाबी गर्ने गगन थापा निकट मानिने लक्ष्मी दाहालको समूहले कुटपिट मच्चाएको कँडेल समूहको दाबी छ। कँडेल घाइते भएर विगत पाँच दिनयता एभेरेस्ट अस्पताल उपचारत छिन्। कँडेल कांग्रेस केन्द्रीय सदस्य काफ्ले निकट विद्यार्थी नेता हुन्।

समानुपातिकबाट स्ववियु उपाध्यक्ष निर्वाचित भएकी कँडेलको टाउकोमा चोट लागेको छ। कुटपिटबाट घाइते भएकी कँडेललाई भेट्न नेविसंघ अध्यक्ष दुजाङ शेर्पा, कांग्रेस केन्द्रीय सदस्य लक्ष्मी खतिवडा, महामन्त्री विश्वप्रकाश शर्मालगायतका नेता अस्पताल पुगेका थिए।

चैत ५ गते भएको स्वतन्त्र विद्यार्थी युनियनको चुनावको समानुपातिक सूचीको नाम बुझाउने अन्तिम दिन नेविसंघ केन्द्रीय कार्यसमितिले सूची पठाएको थियो। केन्द्रीय कार्यसमितिको सूचीलाई दाहालको समूहले नमानेपछि विवाद भएको थियो।