डा आरजुको प्रश्न- सामाजिक सञ्जालमा काङ्ग्रेस जिरोमा गइसकेको छ, के हामी जिरोको पार्टी हो?

काठमाडौँ- नेपाली काङ्ग्रेसका नेतृ आरजु देउवा राणाले, नेपाली कांग्रेसले आफ्नो शक्ति चिन्न नसकेको तर्क गरेकी छिन्।

अछाम काठमाडौं सम्पर्क समितिद्वारा आयोजित शुभकामना आदान प्रदान कार्यक्रममा उनले, स्थानीय तहदेखि केन्द्रसम्म सरकारमा रहेको कांग्रेसले आफ्नो शक्ति चिन्न नसकेको बताइन्।

‘सातै प्रदेशमा, केन्द्रमा, ७७३ नगरपालिका, गाँउपालिका अधिकांशमा हामी छौँ। भनेपछि हामी शक्ति भएको स्थानमा छौँ कि हामी कमजोरमा छौ? हामीले आफूलाई चिन्नु पर्छ,’ उनले भनिन्, ‘हाम्रो पार्टीका अग्रज नेताहरुले गर्नु भएको काम जनताको अगाडि प्रष्ट भएकै कारणले नेपाली जनताले हामीलाई हरेक पटक चुनावमा जिताएको छ।’

सामाजिक सञ्जालमा पार्टीको उपस्थिति कमजोर भएको प्रति असन्तुष्टि पोख्दै उनले सकरात्मक सोचेर पार्टीको पक्षमा खरो उत्रिन आग्रह गरिन्।

‘सामाजिक सञ्जालतिर हेर्ने हो भने नेपाली काङ्ग्रेस जिरोमा गईसकेको छ के हामी जिरोको पार्टी हो?’ उनले भनिन् ‘सकारात्मक सोच राख्नु पर्छ हाम्रो जीवन पनि सकारात्मक हुन्छ। राम्रो सोचौं, राम्रो गरौं र राम्रैतिर उन्मुख हुनुपर्छ। पार्टीको कुरामा पनि हाम्रो नेताहरुले धेरै ठूलो मूल्य चुकाएर यो देशलाई यहाँसम्म ल्याएको छ। हरेक कालखण्डमा पार्टीले आफूलाई सावित गर्दै आएको छ। संविधान पनि नेपाली काङ्ग्रेसले नै ल्याएको हो। पार्टीलाई संगठित गर्दै जानुपर्छ।’

आन्तरिक द्वन्द्व व्यवस्थापन गर्दै अघि बढ्नु पर्नेमा जोड दिएकी उनले सकरात्मक बन्न सबैलाई प्रेरणा मिलोस् भन्ने कामना पनि गरिन्।

‘ हामीभित्र भएका नकारात्मक शक्तिहरुलाई कसरी हटाउँने सकारात्मक उर्जा, राम्रो दृष्टि र दैविक गुणहरुलाई बाहिर ल्याउँने समय विजय दशमीले हामीलाई दिएको छ। यो दशैमा आफूभित्र भएको सकारात्मक शक्तिलाई बाहिर ल्याउँन र मनमा भएको रिस, घृणालाई हटाउँन आग्रह गर्छु,’ उनले भनिन्।