६ लाखले छोडे उत्तरी गाजा, बुधबार इजरायल जाँदै अमेरिकी राष्ट्रपति

तेलअबिब- प्यालेस्टाइनको उत्तरी गाजापट्टी खाली गर्न इजरायली सेनाले चेतावनी दिएपछि हालसम्म कम्तीमा ६ लाख जना दक्षिणतर्फ भागेका छन्।

दक्षिणी गाजाको सहर खान युनिसमा एकैघरमा ९० जनासम्म खाँदिएर शरण लिन बाध्य भएको बीबीसी समाचारमा उल्लेख छ।

यसका साथै कतिपय मानिसहरू गल्लीमा नै सुत्न बाध्य भएका छन्। त्यहाँ पिउने पानीको अभाव छ। एउटै पाउरोटीका लागि लामो लाइन लागिरहेको छ। चार लाख जनसंख्या भएको खान युनिस सहरमा ६ लाख मानिस थपिँदा न्यूनतम मानवीय आवश्यकता पूरा गर्न ठूलो संकट छ।

गत अक्टोबर ७ मा हमास समूहले गाजाका सीमावर्ती इजरायली क्षेत्रमा आक्रमण गरेदेखि नै इजरायलले खानेपानी, खानेकुरा, इन्धन र विद्युत आपूर्ति बन्द गरिदिएको छ। गाजाको तीनतिर इजरायलले घेरेको छ भने दक्षिणी भागको सीमा इजिप्टसँग जोडिएको छ।

तर इजरायली सेनाले भने गाजा पठाइने कुनै पनि सेवासुविधामा कुनै कमी नभएको दाबी गरेको छ। उसले गाजामा कुनै पनि मानवीय संकट नभएको पनि जिकिर गरेको छ।

यसैबीच अमेरिकी राष्ट्रपति जो बाइडेनले इजरायलको भ्रमण गर्ने भएका छन्। बुधबार उनी इजरायल पुग्ने तयारीमा छन्। उनले गाजामा आक्रमण गरिरहेको इजरायलले बनाएको आगामी योजनाबारे इजरायली पक्षसँग कुराकानी गर्ने बताइएको छ।