भूकम्पपीडितको उद्धार र राहतका लागि सरकारलाई ५० लाख दिने कांग्रेसको निर्णय

काठमाडौँ- जाजरकोट भूकम्पपीडितको उद्धार, राहत र पुनर्स्थापनाका लागि नेपाली कांग्रेसले ५० लाख सरकारलाई सहयोग गर्ने भएको छ। कांग्रेसले केन्द्रीय राहत कोषमा ५० लाख उपलब्ध गराउने निर्णय गरेको कांग्रेस कार्यालयका मुख्यसचिव कृष्णप्रसाद पौडेलले जानकारी दिए।

‘भूकम्प पीडितहरुको उद्धार, राहत र पुनर्स्थापनाका लागि नेपाली कांग्रेसले रु ५० लाख नेपाल सरकारलाई उपलब्ध गराउने निर्णय गरिएको छ,’ कांग्रेसको विज्ञप्तिमा उल्लेख छ।

जाजरकोट जिल्लाको रामीडाँडा केन्द्रविन्दु भएर शुक्रबार राति ११ः४७ मा गएको ६.४ म्याग्निच्युडको भूकम्पका कारण जाजरकोट र रुकुम (पश्चिम) लगायतका क्षेत्रमा ठूलो मानवीय र भौतिक क्षति भएको छ। यो घटनाले पार्टीलाई मर्माहत बनाएकोसमेत कांग्रेसको विज्ञप्तिमा भनिएको छ।

उसले घाइतेहरूको उपचार र पुनर्स्थापनामा पनि एकजुट हुन सबैमा अपिल गरेको छ। भूकम्पमा परी हालसम्म १२९ जनाको मृत्यु भएको प्रहरीले जानकारी दिएको छ। ९२ जना जाजरकोटमा र रुकुम पश्चिममा ३७ जना भूकम्पमा परी मृत्यु भएको विवरण प्रहरीमा प्राप्त भएको छ।

जाजरकोटमा जम्मा ५५ घाइतेको भेटिएका छन् भने रुकुम पश्चिममा ८५ जना घाइते भएको कडायतले जानकारी दिए। प्रभावित जिल्लाहरूमा उद्धारकार्य जारी रहेको प्रहरीको भनाइ छ।

उता सभापति देउवाले अर्को छुट्टै विज्ञप्ति जारी गर्दै भूकम्पबाट प्रभावितहरुलाई सुरक्षितस्थल तर्फ तत्काल स्थानान्तरण गर्न, युद्धस्तरमा उद्धारको कार्य गर्न, घाइतेहरुको उपचार र राहतको कार्यमा सक्रियता साथ परिचालन गर्न प्रधानमन्त्रीलगायत नेपाल सरकारसँग जोडदार माग गरेका छन्।

कठिन घडीमा नेपाली कांग्रेसका सम्पूर्ण पार्टी निकायलाई भूकम्प प्रभावित क्षेत्रमा सक्रियतापूर्वक उद्धार, राहत र पुनर्निर्माणमा जुट्न पनि उनले निर्देश गरेका छन्।

विनाशकारी भूकम्पमा परी दिवंगतप्रति श्रद्धाञ्जली परिवारजनप्रति उनले समवेदना प्रकट गरेका छन्। घाइतेहरुको शीघ्र स्वास्थ्यलाभको कामना पनि उनको विज्ञप्तिमा गरिएको छ।