१३ बैंकले घटाए ब्याजदर, माछापुच्छ्रेले बढायो

काठमाडौँ- वाणिज्य बैङ्कहरूले मङ्सिर महिनाका लागि नयाँ ब्याजदर सार्वजनिक गरेका छन्।  कात्तिक महिनाको अन्तिम दिन बिहीबार सूचना प्रकाशित गर्दै मंसिरबाट लागू हुने गरी नयाँ ब्याजदर प्रकाशित गरेका हुन्।

बैङ्कहरूले सार्वजनिक गरेको नयाँ ब्याजदर अनुसार अधिकांश बैङ्कको व्यक्तिगत मुद्दती निक्षेपको ब्याजदर कात्तिकको तुलनामा घटेको छ।

कात्तिक महिनामा ९.९६ प्रतिशत रहेको वाणिज्य बैङ्कहरूको व्यक्तिगत मुद्दती निक्षेपको अधिकतम औसत ब्याजदर मङ्सिर महिनामा ०.३३ प्रतिशत बिन्दु घटेर ९.६३ प्रतिशतमा झरेको छ।

त्यसै गरी संस्थागत मुद्दती निक्षेपको अधिकतम ब्याजदर ०.३०६ प्रतिशत बिन्दु घटेर ७.५४ प्रतिशतमा झरेको छ।

२० वाणिज्य बैङ्कमध्ये १३ वाणिज्य बैङ्कले मङ्सिर महिनाका लागि ब्याजदर घटाएका छन्। सबैभन्दा धेरै ब्याजदर घटाउनेमा एनआइसी एसिया बैङ्क छ।

एनआइसी एसियाले कात्तिक महिनाका तुलनामा मङ्सिर महिनामा ब्याजदर २.०३ प्रतिशत बिन्दुले घटाएको छ। बैङ्कले मङ्सिर महिनामा व्यक्तिगत मुद्दती निक्षेपमा अधिकतममा ८.९६ प्रतिशत ब्याज दिने भएको छ।

एनआइसी एसियापछि सबैभन्दा बढी ब्याज घटाउनेमा एनएमबी बैङ्क लिमिटेड रहेको छ। एनएमबीले मङ्सिर महिनाका लागि ब्याजदर १.२४ प्रतिशतभन्दा घटाएर ९.७६ प्रतिशतमा झारेको छ।

६ वाणिज्य बैङ्कले कात्तिक महिनाकै ब्याजदरलाई निरन्तरता दिएका छन् भने माछापुच्छ्रे बैङ्कले ब्याजदर बढाएको छ। कात्तिकमा व्यक्तिगततर्फको अधिकतम ब्याजदर ९.९९ प्रतिशत राखेको माछापुच्छ्रेले मंसिरका लागि १०.६०३ प्रतिशत पुर्‍याएको छ। यस्तै संस्थागततर्फ भने ७.४९ प्रतिशतबाट बढाएर मंसिरमा ८.६०३ प्रतिशत पुर्‍याएको बैंकले जानकारी दिएको छ।

कात्तिककै ब्याजदर यथावत् राख्नेमा सिटिजन्स बैंक इन्टरनेसनल, सिद्धार्थ बैंक, लक्ष्मी सनराइज बैंक, कुमारी बैंक, प्राइम कमर्सियल बैंक र नेपाल बैंक छन्। ‘क’ वर्गका बाँकी १३ बैंकले केही न केही मात्रामा ब्याजदर घटाएकै छन्।