पप्पुबाट ‘बदनामी’ कमाएका ठेकेदारलाई एमाले भित्र्याउँदै ओली

काठमाडौँ- नेकपा एमालेका अध्यक्ष केपी शर्मा ओलीले देशभर दर्जनौँ निर्माण ठेक्का अलपत्र पारेर बदनामी कमाएका ठकेदारलाई एमालेमा भित्र्याउने भएका छन्। पूर्वसांसदसमेत रहेका पप्पु कन्स्ट्रक्सनका सञ्चालक हरिनारायण रौनियारलाई ओलीले टीका लगाइदिने अन्तिम तयारी गरेका हुन्।

मंगलबार पर्सा पुगेर ओलीले रौनियार र उनका समर्थकलाई पार्टीमा भित्र्याउन लागेका हुन्। रौनियार जनता समाजवादी पार्टी (जसपा) मा थिए। २०७४ को निर्वाचनमा सांसदसमेत निर्वाचित भएका उनी पप्पु कन्स्ट्रक्सनको कामका कारण आलोचित छन्। ठेक्कामा भ्रष्टाचार र गुणस्तरहीन काम गर्नमा पप्पु अगाडि छ। अख्तियार दुरुपयोग अनुसन्धान आयोगले उनीविरुद्ध मुद्दा दर्ता गराएपछि उनी निलम्बनको कारबाही खेपिसकेका छन्।

पप्पुका कारण बदनामी मात्र कमाएपछि रौनियारले कागजी रूपमा पप्पुबाट आफू अलग भएको देखाएका छन्।

मंगलबार पर्साको सखुवा प्रसौनी गाउँपालिकामा सभा गर्दै आफू एमालेमा प्रवेश गर्न लागेको रौनियारले बताएका छन्। उनले भनेका छन्, ‘देश र जनताको समृद्धिको सापेक्ष दृष्टिकोण एमाले र अध्यक्ष केपी ओलीमा मात्र देखियो। उहाँको नेतृत्वले मात्र हामीले चाहेको विकास र समृद्धि सम्भव देखेँ।’ उनले आफूसँगै थुप्रै शुभचिन्तक पनि अब एमाले बन्ने बताए।