हमासले रिहा गर्‍यो २५ बन्धक

तेलअबिब- इजरायली क्षेत्रमाथि अक्टोबर ७ मा आक्रमण गरी हमासले बन्धक बनाएकामध्ये २५ जनालाई रिहा गरेको छ। बिहीबार साँझको समयमा बन्धकलाई हमासले रिहा गरेको इजरायलले जानकारी दिएको छ।

बन्धक भएकामध्ये १२ जना थाई नागरिक छन् भने १३ जना इजरायली नागरिक छन्। १३ जना इजरायली नागरिकलाई इजिप्टसँगको सीमामा रेडक्रसलाई हस्तान्तरण गरिएको इजरायलले जानकारी दिएको छ। उनीहरू सबै स्वस्थ रह‍ेको इजरायलले जानकारी दिएको छ।

थाई नागरिकलाई पनि इजिप्टबाटै रिहा गरिएको हो। थाई प्रधानमन्त्री श्रेथा थाबिसिनले हमासले बन्दी बनाएका १२ जना आफ्ना नागरिकलाई रिहा भएको बताएका छन्।  ‘यो सुरक्षा पक्ष र परराष्ट्र मन्त्रालयले १२ थाई बन्धक रिहा भएको पुष्टि गरेका छन्,’ प्रधानमन्त्री श्रेथा थाबिसिनले एक्समा पोस्ट गरेका छन्।

थाई नागरिक भने हमास-इजरायलबीचको युद्धविराम सम्झौतामा उल्लेख गरिएको संख्या ५० मा समावेश नहुने इजरायलले बताएको छ।

कतारको मध्यस्थतामा हमास र इजरायलबीच युद्धविराम समझदारी भएको थियो। चार दिनसम्म युद्धविराम समझदारी भएको छ। इजरायलले भने जेलमा राखेका १५० जनालाई रिहा गर्ने सम्झौतामा उल्लेख छ।

अक्टोबर ७ मा हमासले इजरायली क्षेत्रमा आक्रमण गरी २४० जनालाई बन्धक बनाएको बताइएको छ। हमासको आक्रमणमा परी १२ सय जनाको मृत्यु भएको थियो। हमास आक्रमणमा १० नेपाली नागरिकको पनि मृत्यु भएको थियो भने कञ्चनपुरका विपीन जोशी बन्धक छन्। थाई बन्धककै समूहमा नेपालका विपीन जोशी पनि रहेको बताइएको थियो। हमासले दोस्रो चरणमा विपीनलाई रिहा गर्न सक्ने इजरायलस्थित नेपाली दूतावासले अपेक्षा गरेको छ।

कतारी परराष्ट्र मन्त्रालयका प्रवक्ता डा माजेद अन्सारीका अनुसार इजरायलले पनि ३९ जना प्यालेस्टाइनी कैदीलाई रिहा गरेको छ। इजरायल-हमास युद्धविराम सम्झौतामा कतारले मध्यस्थता गरेको छ।

इजरायलले गाजामाथि गरेको जवाफी आक्रमणमा परी हालसम्म १४ हजारभन्दा बढीको मृत्यु भएको छ भने लाखौँ विस्थापित भएका छन्।